Åtvarar småbarns­foreldre om aukande RS-smitte: – Hald dei unna sjuke menneske

Sjekk status for RS-situasjonen på desse sjukehusa: Ullevål, St. Olavs, Haukeland, Stavanger, Vestfold, Nordland.

Barneavdelinga ved Sjukehuset Telemark i Skien er no heilt full.

Mange små barn er smitta med ulike virusinfeksjonar, og tre av dei er stadfesta smitta med RS-viruset.

– No begynner RS å komme. Det vil bli det dominerande viruset i løpet av få veker, seier klinikksjef Ansgar Berg.

Sist helg måtte seks barn som var innlagde ved Sjukehuset Telemark få pustehjelp.

– Danmark ligg rundt seks veker framfor oss og har hatt toppen sin. Vi forventar å få toppen vår om to til tre veker.

Han seier RS-viruset er eit forkjølingsvirus som kan gi alvorlege infeksjonar hos små barn, spesielt barn under tre månader.

RS-smitta barn kan få vanskar med å puste og treng ofte pustehjelp, og ei rekke barneavdelingar i Sør-Noreg blir no fylte opp.

Ved Sjukehuset i Vestfold er det no 22 sjuke barn på 18 senger.

Mange har luftvegsinfeksjonar, men barn under halvtanna år er hovudsakleg smitta av RS-viruset.

Fem barn har fått påvist viruset.

– Det er skikkeleg trykk akkurat no, seier overlege ved barneavdelinga, Morten Falke.

Dei har derfor ikkje kunna avlaste sjukehuset i Drammen, der det også er fullt.

Full avdeling i Oslo

På Ullevål sjukehus i Oslo er no sengeposten for infeksjonssjuke barn fylt opp med RS-sjuke barn.

– Det ser ut som vi er på veg oppover. Førre veke var det ei dobling sidan veka før jul, seier Astrid Rojahn, overlege på barneinfeksjonsavdelinga.

Ho seier dei fleste har milde symptom, men at nokon hamnar på intensiven i nokre dagar for å få kontinuerleg pustestøtte for å halde luftvegane opne.

Ved Haukeland universitetssjukehus i Bergen er åtte barn innlagde med RS-viruset, og fire med andre virus.

– Vi har mange pasientar, men ikkje betydeleg fleire med luftvegsinfeksjon enn det som er vanleg på denne årstida, seier Maria Vollsæter, klinikkdirektør ved Barne- og ungdomsklinikken, Helse Bergen.

Stavanger universitetssjukehus har hatt mellom fem og ti innlagde denne veka.

– Vi ser at det aukar gradvis frå dag til dag og ventar ein topp nå mot midten av februar, seier avdelingssjef for barne- og ungdomsklinikken, Berit Helgeland Kyllevik.

St. Olavs hospital i Trondheim har eit par pasientar med RS. Dei har hatt enkelte døgn med fleire innlagde, men opplever ingen stor bølge.

Barneklinikken ved Nordlandssykehuset har ingen barn innlagd med RS.

– Hald dei unna sjuke menneske

Klinikksjef Ansgar Berg ved Sykehuset Telemark seier det er viktig at foreldre som har spedbarn tar forholdsreglar.

Det er viktig med god hoste- og handhygiene og å halde avstand viss du er sjuk, spesielt for de aller minste barna.

– Hald dei unna sjuke menneske, og unngå å ha med veldig små barn innandørs, som på kjøpesenter.

– Blei forskrekka da han måtte leggjast inn

Sjølv om dei tilsette jobbar med å behandle pasientane, er dei ikkje immune.

Det merka avdelingsoverlegen Kate Anita Berge da ho, for fleire år sidan, tok med sitt nyfødde barn på besøk til ein slektning og guten begynte å puste dårleg etterpå.

– Eg skjønte etter kvart at eg måtte ta han med på legevakta, og eg blei forskrekka då legen med ein gong sa han måtte leggjast inn.

Ho hadde ikkje skjønt at det var så ille, men har tenkt mykje på hendinga i ettertid.

– Når ein har små barn, er det veldig viktig å vere i forkant og undersøke før ein besøker nokon eller reiser nokon stad, slik at det ikkje er fare for å bli smitta.