– Eg trur mange har lyst til å bremsa julegåvekarusellen, seier Henriette Hack, som jobbar som frivilligkoordinator og kontorleiar i Den Norske Turistforening.
Likevel ønskjer me å gi gåver med kjærleik og meining, sjølv om fleire av oss kjenner på dårlegare råd enn før.
Turistforeininga merkar at stadig fleire av oss set pris på opplevingsgåver.
– Du kan leggja mykje kjærleik og innsats i ei slik gåve, sjølv om ho kanskje kostar deg lite i kroner og øre. For å gjera gåva meir konkret kan du foreslå datoar og stader, og leggja med noko du må ta med under opplevinga.
Her får du ni gode tips til opplevingar du kan gi bort til jul.
Gi bort ein hyttetur
Gi bort ein hyttetur og deg sjølv som turfølgje. Om det ikkje passar med overnatting, er dagstur eit fint alternativ. Då kan hytta vera eit turmål.
– Ta eit vaffelbesøk på Fugleleiken på Luksefjell, eller Jambakkmyra på Krokheia, seier Hack.
Eit kart med invitasjon til tur
Gi bort eit kart til ein tur som de kan gjennomføra saman. Kartet kan vera brukt eller kjøpt nytt. Rull det saman, knyt ei raud sløyfe rundt og heng det på juletreet.
– Det kan vera ei spennande oppleving for barn, frå å pakka ut kartet til sjølve «ekspedisjonsdagen». I DNT tenkjer me at det er ei gåve å oppleva naturen saman med nokon ein er glad i.
Ein middag ute
Det er noko ekstra spesielt med eit måltid utandørs. Gi bort ein kveldstur i nærmiljøet og middag frå bål, primus eller termos.
– Kva med fiskeburgar i hamburgarbrød, søt chilisaus og råkostsalat. Nam!
Reparasjon av turklede eller utstyr
Er du god til å reparera og fiksa, kan du gi bort eit heimelaga klippekort på reparasjonar.
– Meir miljøvennleg gåve finn du neppe. Du kjøper ikkje noko nytt, og kleda og utstyra til mottakaren får eit lengre liv, seier Hack i Turistforeininga.
Gi bort kunnskap til jul
Det er aldri for seint å læra noko nytt. Kanskje du kan gi nokon ein ny hobby, og eit minne for livet.
– I DNT pleier me å arrangera kart- og kompasskurs, turleiarkurs og ferskingskurs.
Lakenpose eller sengesett
Lakenposar eller sengesett som laga av mykt og slitesterkt stoff, til dømes i voven natursilke kan vera ei fin gåve. Desse produkta lever og kan brukast lenge, og dermed er miljøbelastninga lågare enn for produkt av kortare levetid.
Inviter på båltur i nærmiljøet
Skriv eit julekort der du inviterer på båltur, gjerne på ein spesiell dato, slik at både mottakar og givar kan byrja å gle seg. Når dagen kjem, pakkar du sekken og tek med litt ved. Så kan de kosa dykk med å grilla noko på bålet.
– Noko som er kjempelett og kjempegodt, er to skiver med ost imellom. Smør litt smør på utsida for å få skiva litt sprø, og pakk den inn i folie før du varmar ho på bålet. Dette er ein innertiar hos dei fleste barn.
Turbøker
Det finst mange gode inspirasjonsbøker for den som planlegg turar eller treng inspirasjon for å komma seg ut. Om du har ei brukt bok du sjølv er glad i, kan du gi bort ho og forklara med eit kort kva som er ekstra bra med boka.
– Ei personleg boktilråding er ei gåve med meining.
Hei
Takk for at du leser. Har du tips eller innspill til denne saken eller andre ting vi bør skrive om? Send meg gjerne en e-post!