Folk i det krigsherja området Aust-Ghouta står søndag i kø for å komme med på ein av dei rundt 20 bussane som er på plass for å transportere opprørarar og familiane deira ut av området.
Laurdag blei 980 menneske sende ut i 17 bussar og mange ambulansar. Abdullah Alsalti er ein av dei heldige.
– Ingen ting å ete, ingen ting å drikke, varene var ekstremt dyre. Det var verkeleg ille i Aust-Ghouta, og det var fornedrande å leve under slike forhold. Men no er vi ute, seier Abdullah Alsalti.
– Ingen ting å glede meg over
No håpar folk at dei kan sleppe å leve i krig meir, at dei kan få eit meir normalt liv.
– Eg har ikkje hatt noko å glede meg over på lenge. Eg håpar verkeleg ting blir betre. Takk Gud, seier Hiba, som ikkje vil seie etternamnet sitt.
– Vi har greidd å halde ut, vi har gjort alt vi kunne for å halde oss i live. Dette er motstandskraft i praksis. Slik er det syriske folk, seier Asaad Nakhle, som også er trygt ute av området.
- Les også:
- Les også:
Aust-Ghouta ligg utanfor den syriske hovudstaden Damaskus, og har sidan 2013 vore kontrollert av ulike opprørsgrupper.
18. februar starta siste runde med harde kampar mellom opprørarane og dei syriske regjeringsstyrkane, som har støtte frå Russland.
Kontrollerer rundt 90 prosent
Minst 1600 sivile er drepne i kampane, og regjeringsstyrkane har no fått kontroll over rundt 90 prosent av området, ifølgje Syrian Observatory for Human Rights (SOHR).
Opprørarane sit igjen med kontrollen over berre ein by.
Tidlegare i veka blei det inngått ein avtale om evakuering mellom styresmaktene og ei av opprørsgruppene. Truleg vil rundt 7000 menneske kunne bli sendt ut med buss som ein del av denne avtalen. Ein tilsvarande avtale blei gjort for ein annan del av området i førre veke.
Ifølgje statskringkastinga i Syria har minst 107.000 sivile flykta frå Aust-Ghouta dei siste vekene. No prøver styresmaktene å få på plass ein avtale om evakuering frå den siste byen som opprørarane framleis kontrollerer, Douma.