Ny Israel-politikk, lettkledde bilete på framsida av VG og frieri til FrP.
Dette er nokre av mange omstridde forsøk på å fornya KrF, som har gjort nestleiar i Kristeleg Folkeparti (KrF), Inger Lise Hansen (29) svært upopulær i eigne krinsar.
- LES OGSÅ: Hun har skutt partiet i begge beina
- LES OGSÅ: Hansen misliker undertøys-oppslag
Alt tyder no på at hennar dagar i partileiinga er talde, men den politiske karrieren til Hansen er på ingen måte over av den grunn, meiner politisk redaktør i Dagbladet, Marie Simonsen. Ho spår ein overgang til partiet Høgre.
– Ein politikar med Inger Lise Hansen sine ambisjonar, styrkar og kvalitetar vil sjå seg om. For alt me veit, ender ho i Høgre, seier Simonsen til NRK.no.
– Høyrer heime med Erna
Simonsen karakteriserer Hansen som urban, moderne og liberal, men politisk konservativ.
Ho meiner denne samansetningen vert sett på som paradoksal i KrF-samanheng, og at det er ved Erna Solbergs side at Hansen eigentleg høyrer heime politisk.
- LES OGSÅ: Høybråten advarer mot å kaste Hansen
– Hennar politiske sympatiar ligg klart i retning av Høgre, seier Simonsen som viser til at det allereie har vore ein del overgangar frå KrF til Høgre på lokalt plan
– Det kan også skje på riksplan.
Høgra opnar armane
Etter at urokråka Hansen i mars provoserte eigne partifeller med sexy posering på framsida av VG, var fleire av partitoppane i Høgre ute med hjartelege invitasjonar.
– Fleire av hennar standpunkt stemmer godt med det Høgre står for, sa dåverande nestleiar, Erling Lae, til VG.
– Ho er ung, pen og dyktig. Me ville sjølvsagt ikkje ha takka nei til å ha henne i partiet vårt, uttalte stortingsrepresentant André Oktay Dahl til avisa.
På noverande tidspunkt vil ikkje Høgre ytra seg om ein eventuell Hansen-overgang.
– Dette er ei sak som KrF må ta internt. Om det viser seg at Hansen vil til Høgre, får me ta stilling til det når den tid kjem, seier pressevakt i Høgre, Kathrine Olsen.
Unge Høgre er derimot ikkje i tvil. Leiar Henrik Asheim seier dei opnar døra på vidt gap for Hansen:
– Om KrF ikkje ønskjer den liberale utviklinga som Hansen frontar, er ho meir enn velkommen til å engasjera seg i Høgre.
Ikkje ønska
Heile 15 av 19 fylkeslag seier til Dagsavisen at dei ikkje vil ha Hansen med vidare i partileiinga.
- LES OGSÅ: Flertallet vil vrake KrF-Hansen
Når valkomiteen i KrF kjem saman for å setja saman ein ny leiartrio i morgon, er det svært liten oppslutnad om å ha med dagens andre nestleiar, Inger Lise Hansen, vidare.
– Inger Lise Hansen er så godt som ferdig i partileiinga til KrF, trur sjefredaktøren i avisa Vårt Land, Helge Simonæs.
Simonsen i Dagbladet trur utspelet om eit samarbeid med FrP var dråpen som fekk begeret til å flyta over internt i KrF.
– Stort tap for KrF
– At Hansen gjekk ut på eigen kjøl og fridde til FrP, blei nok oppfatta som veldig illojalt av mange, og dette handlar faktisk om lojalitet til leiinga. Ho har kome med for mange soloutspel.
- LES OGSÅ: Vil ha ny Israel-politikk
Uansett kva Hansen bestemmer seg for å gjera vidare, er den politiske redaktøren klar på at å mista den unge og liberale i leiartroppen, vil vera eit stort tap for KrF.
– Det eg trur er viktig for KrF er å ha appell til eit breiare og yngre publikum. Her treng dei til dei grader ei som Inger Lise Hansen. Det er dei som ønskjer seg eit smalt KrF som blir vinnarane dersom Hansen forsvinner, meiner Simonsen.
Vaklande KrF-støtte
KrF har lenge vore ute på tynn is. Ved Stortingsvalet i 2009 fekk partiet ein oppslutnad på snaue 5,5 prosent. I fleire målingar etter valet har partiet ligge på vippen av sperregrensa på fire prosent.
- LES OGSÅ: – KrF dør snart en naturlig død
Intern strid om kvar vegen går vidare for sentrumspartiet, førte nyleg til at partileiar Dagfinn Høybråten kunngjorde sin av gang som partileiar på det kommande landsmøtet i april 2011. Mange meiner at dersom KrF skal reisa seg att, må heile partileiinga skiftast ut.
Men sjølv om Hansen førebels er stengd ute i kulda av KrF`erane, vil Simonsen ikkje utelukka at ho kan bli teken inn i varmen att.
Endring med Hareide
Ho meiner leiarskiftet som kjem, med Knut Arild Hareide som ny partileiar, kan gjera KrF til eit opnare parti som vil fri til ei breiare veljarmasse,
- LES OGSÅ: Hareide: – Vil kjempe som ei løve
– No er KrF så langt nede at dei må samla seg og byggja seg opp att. Med Hareide som partileiar vil partiet moderniserast og bli opnare enn det er i dag.
– Dermed vil partiet kunne innsjå at det også er plass og behov for slike som Hansen, legg Simonsen til.
Inger Lise Hansen har førebels ikkje svart på NRK sine førespurnader om å kommentera saka.