Politiet i fylket Suffolk fryktar at det går ein seriedrapsmann laus i området.
I løpet av dei siste åtte dagane er tre prostituerte kvinner funne drepne. Tidlegare i dag vart det kjent at ei fjerde kvinne var saka, og i kveld opplyser politiet at ei femte prostituert har forsvunne.
Leiaren for etterforskinga, Stewart Gull, seier at dei ikkje veit kven dei skal leite etter.
Vanskeleg
- Drapsmannen kan vere frå lokamiljøet, men han kan også kome frå ein annan stad. Vi kan trekkje ei rad ulike konklusjonar ut frå kvar vi har funne dei tre lika, men alt er ope. Vi veit ikkje kven vi skal sjå etter, seier han.
Gemma Adams vart meld sakna 15. november. Liket hennar vart funne 2. desember i ei elv like ved Hintlesham.
Tania Nicol forsvann 30. oktober. Liket hennar vart funne i Copdock 8. desember. Alle tre var nakne då dei vart funne.
Liket av ei tredje prostituert kvinne vart funne i går 10. desember nær Nacton.
29 år gamle Anette Nicholls, som har livnært seg som prostituert i Ipswich, har ikkje vore i kontakt med familien sin på over ei veke.
34 år gamle Paula Clenell vart meld sakna i går, etter at ingen hadde sett henne sidan kvelden før.
- Det kan vere heilt naturlege forklaringar på at desse jentene er melde sakna, men sett i lys av det som har skjedd med andre prostituerte, gjer vi alt for å finne dei, seier Stewart Gull.
Åtvaring
Politiet åtvarar alle kvinner, ikkje berre prostituerte, mot å opphalde seg åleine ute om kvelden. I ein direkte appell til alle kvinner i Suffolk sa assisterande politisjef Jacki Cheer følgjande tidlegare i dag:
- Ver så snille å halde dykk unna gatene. Om de er ute åleine om kvelden er de i livsfare. Det nærmar seg jul og den store festsesongen. Mange kvinner vil gå ut, og de må passe på kvarandre. De må planleggje korleis de skal kome dykk ut på byen, og hugs også å planleggje korleis de skal kome dykk heim. Kom ikkje bort frå kvarandre, sa ho i ein kjensleladd appell.
