Skyting på Vestbreidda: Minst ti palestinarar skal vere drepne og nesten 100 såra

Israelske soldatar rykte inn i Nablus på den okkuperte Vestbreidda onsdag morgon, der dei møtte væpna motstand.

Dei skal ha kome med fleire dusin panservogner og spesialstyrkar, ifølge avisa Al Jazeera.

Palestinske helsestyresmakter seier at 97 palestinarar blei såra, seks av dei kritisk, i kampane som følgde. Minst ti er drepne av israelske soldatar, melder AFP.

Ein talsperson for den israelske hæren opplyser til avisa Haaretz at soldatane jakta på to militante palestinarar.

Desse to skal no vere drepne, så vel som blant anna ein 72 år gammal mann og ein 14 år gammal gut.

Den militante gruppa Islamsk jihad seier at eit hus der to av kommandantane deira heldt til blei omringa av israelske soldatar.

Omringa «gøymestad»

Dei to som er nemnde av den israelske hæren var skulda for tidlegare skyteepisodar på Vestbreidda og hadde leilegheita som «gøymestad».

Militær talsperson Richard Hecht hevdar til New York Times at dei var i ferd med å planlegge nye angrep, og stod bak drapet på ein israelsk soldat i oktober.

Dei israelske styrkane skal ha blokkert alle vegar inn til byen før dei omringa huset. Fleire væpna personar skal ha blitt involverte i kampane som følgde dette.

I byen laud det høge eksplosjonar, og uvæpna ungdommar skal ha kasta appelsinar, stein og tunge gjenstandar mot pansra personellkøyretøy.

Tidsstempla overvakingsvideo som avisa har fått innsyn i, viser at minst to uvæpna palestinarar blir skotne på flukt vekk frå valden.

Det israelske militæret seier til avisa at dei undersøker denne videoen, og hevdar i eit separat utsegn å ha «nøytralisert» tre væpna personar.

– Ikkje starten på ein tredje intifada

Arild Schou er professor på Universitetet i Sør-Aust Noreg, og har skrive doktorgrad om Israel-Palestina konflikten.

Han tolkar ikkje valdseskaleringa ein ser no som starten på ein tredje intifada, eller storskala opprør frå palestinsk side.

– Den første intifadaen var ein låg-valdeleg intifada med brei oppslutning, og den andre intifadaen var på mange måtar ein ganske valdeleg intifada som førte til eit par tre krigar mellom Israel og Hamas, seier han til NRK.

– Eg trur det skal litt til for at ein eventuelt tredje intifada tek av, fordi Vestbreidda og Gaza-palestinarane er ekstremt splitta ideologisk og sjølvsagt geografisk.

Det som kjenneteikna den første intifadaen, seier Schou, var at ein såg ei kollektiv organisering begge stader, og at undergrunns-leiarskapet var nokså avansert.

Dette ser ein ikkje i dagens situasjon, korkje på Vestbreidda eller i Gaza, meiner han.

– Slik eg ser det, er det meir eit krampaktig opprør utan mål og meining. Det er altfor tidleg å seie om det kan bevege seg i retning av eit kollektivt opprør før ein ser noko organisering over tid.

– I dag er det meir splitting enn noko sinne, og lite politisk godteri i den andre enden dersom ein etablerer noko slikt.

Minst 57 palestinarar drepne hittil i år

Minst 57 palestinarar har hittil i år blitt drepne av israelske soldatar og folk som bur på Vestbreidda, seier det palestinske helsedepartementet ifølge Reuters.

Blant desse skal det vere fleire barn.

Minst 11 israelarar har også blitt drepne av palestinarar sidan året starta, inkludert sju i ei masseskyting 27. januar i Jerusalem. Dette var det dødelegaste angrepet på byen sidan 2008.

På Gaza-stripa seier ein talsperson for den militante gruppa Hamas at valden i området «har eskalert».

– Opposisjonen i Gaza observerer at fienden eskalerer dei kriminelle handlingane sine mot folket vårt på den okkuperte Vestbreidda, og tolmodet er i ferd med å renne ut, sa talsperson for den militante gruppa Abu Obeida.

Israel har trappa opp militæraksjonar, arrestasjonar og drap på Vestbreidda sidan juni 2021, som følgde eit populært palestinsk opprør som er kjent som «mai-utbrotet», skriv Al Jazeera.

FN markerte 2022 som eitt av dei dødelegaste åra for palestinarar på Vestbreidda sidan 2006.

Generalsekretær António Guterres bad Israel onsdag om å slutte å etablere busetnader i dei okkuperte palestinske områda, ifølge AFP.

– Kvar ny busetnad er eit hinder på vegen til fred. All busetnad i desse områda er ulovleg ifølge internasjonal lov, sa han.

– Ingenting rettferdiggjer terrorisme.