Utstyrt med ei rifle spaserte mannen inn i ein bar i den katalanske byen Olot rundt klokka 8 i dag tidleg.
Inne i baren avfyrte han dødelege skot mot to personar, før han køyrde vidare til ein bankfilial og drap direktøren og ein annan person som var tilstades i lokalet, opplyser den spanske avisa El Pais.
– Han sa ingenting. Han berre kom inn med ei rifle i handa, skaut og la på sprang, seier den tydeleg rysta ektemannen til eigaren av baren, Guzmán Sánchez, til spansk TV3.
Far og son drepen
Skytedesperadoen myrda i alt fire personar før han flykta i bil. Kort tid etter vart mannen pågripen av lokalt politi.
Olot ligg drøye hundre kilometer nordaust for Barcelona.
Dei to personane som vart drepne inne i baren, ein far og sonen hans, var eigarar av byggfirmaet Constructors Tuber.
Ifølgje kjelder som Europa Press har snakka med, skal drapsmannen tidlegare ha vore tilsett som murar i firmaet.
Motivet bak ugjerninga er førebels ukjend, men El Pais skriv at mannen nyleg hadde vorte oppsagd fordi byggfirmaet sleit økonomisk.
Noterte bilnummer
Snarrådige vitne noterte seg bilnummeret til drapsmannen.
Dette, i tillegg til detaljerte skildringar av personen skal ha ført til at politiet raskt kom på sporet av mannen og fekk arrestert han.
Den rystande hendinga vert no etterforska av politiet i Olot i Catalonia.
