Såg heimbyen brenna på direkte-TV: – Klarte ikkje la vere å sjå

Familien hadde berre vore tilbake i huset sitt i Grindavík i ei veke då Valgerður Ágústsdóttir vakna til kjensla av eit jordskjelv.

10. november i fjor vart dei evakuerte. Natt til sundag sa ei stemme inni ho at dei måtte dra igjen.

– Det er ein spesiell lyd som me kjenner att, som eg trur er lavaen under byen, seier Ágústsdóttir til NRK.

Like etter klokka 04.00 fekk dei SMS med beskjed om å evakuera. Då hadde dei allereie pakka i nærare 40 minutt.

– Me hjelpte kvarandre med å ta med matvarer og gå ut med søpla. Så drog me.

Såg utbrot på direkte-TV

NRK møter Ágústsdóttir og familien i byen Reykjanesbær på Island. Der har dei vore mest heile tida sidan førre utbrot i november.

– Me kan bli her, men det er ikkje heime. Grindavík er mi trygge hamn. Venane og familien min er der. Eg elskar naturen. Å isbade i havet. Det er der eg kjenner meg bra, seier Ágústsdóttir.

Difor var det tungt å sjå heimbyen brenna på direktesendt TV. Lavaen rann forbi berre fem-seks hus unna hennar.

– Me sat limt til TV-en utan å eigentleg villa sjå det. Eg klarte ikkje la vera å sjå. Det har ikkje sokke skikkeleg inn.

– Det var ikkje noko god kjensle. Før var eg usikker på om denne augeblinken nokosinne ville kome. Me er alltid klare for eit utbrot, men når det skjedde, var det uverkeleg, seier Ágústsdóttir.

– Mykje ein ikkje veit

På trygg avstand frå heimbyen hennar, møter Sólveig Thorbergsdóttir frå Grindavík NRK.

Ho ser utover fjella og røyken som stig opp.

– Ein spør seg sjølv om ein kan sjå på det som skjer. Det må vera forferdeleg for dei som bur der, seier ho.

Huset hennar i utkanten av byen står framleis, utan dei store skadane. Sjølv om ho vil flytta tilbake, ser ho at det er vanskeleg å leva med uvissa om når neste utbrot kjem.

– Eg innser at det er mykje ein ikkje veit. Ein veit ikkje om det kan koma igjen om ein månad, om det opnar seg eit lavautbrot midt i byen.

Den islandske kringkastaren Ruv skriv måndag ettermiddag at vulkansprekken som opna seg sundag ettermiddag ser ut til å ha stoppa opp.

Samstundes er Grindavík framleis eit høgrisikoområde der nye sprekkar kan opna seg utan forvarsel. Grunnen under byen har stige med opptil 1,4 meter det siste døgnet, skriv Ruv.

Er ikkje redd

Valgerður Ágústsdóttir følar seg fortapt utan Grindavík.

– Eg elskar å bu i Grindavík, og saknar lokalsamfunnet. Eg er ein veldig positiv person, så eg trur me kjem oss gjennom dette saman.

Samstundes er Ágústsdóttir realistisk – livet i Grindavík blir ikkje det same.

– Eg har trua på at me kan byggje Grindavík opp att. Eg er ikkje redd.

Høyr det siste frå NRK Urix: