Syrisk fjernsyn melder at IS-leiar Abu Bakr al-Baghdadi skal ha blitt drepen i eit av dei mange flyangrepa mot Raqqa, byen som blir rekna som IS sin hovudstad.
FØRSTE GANG HAN VISTE SEG OFFENTLEG: 5. juli 2014 viste al-Baghdadi seg i ein moske i Mosul.
Foto: Reuters TV / ReutersByen er ei av dei siste høgborgene til islamistrørsla, og al-Baghdadi skal ha blitt sett der, skreiv The Guardian tidleg i juni.
I helga gjekk USA-støtta opposisjonsstyrkar til angrep, med luftstøtte frå amerikanske krigsfly.
Etter to dagar med strid har styrken kome seg innanfor bygrensene, og kontrollerer to bydelar, melder AFP.
Blodige gatekampar i Raqqa
Ein kvinneleg kommandant delte nyleg bilete på Twitter, der ho står inne i Raqqa.
Syrian Democratic Forces, som dei kallar seg, er ein multietnisk styrke leia av den kurdiske militsen YPG.
Dei har med seg amerikanske spesialstyrkar, som hjelper dei med å koordinere offensiven med flyangrepa, skriv AFP.
– IS skyt på alle som stikk ut hovudet, seier ein soldat til nyheitsbyrået AFP.
Tjukk svart røyk veltar opp frå byen, og det blir rapportert om tung artillerield, og det krasse smellet frå snikskyttar-rifler.
Store bitar av ein kvit kuppel på ein moske, skal vere skoten vekk, men det svarte IS flagget heng framleis på eit og anna tak i Raqqa.
Det står att å sjå om det finst IS-leiarar i byen, eller om dei allereie har funne seg nye gøymestadar.
KRIGSTÅKA: Røyk frå brannar og eksplosiv har lagt seg som eit teppe over Raqqa. Framleis er ikkje slaget over.
Foto: RODI SAID / ReutersNettet snører seg
Etter kvart som kalifatet til IS har byrja kollapse, kjem det nye rykte om kor toppleiarane har gøymt seg.
FLAGG i VINDEN: Der dei irakiske styrkane klarar å kaste ut IS, firer dei flagget for å vise kven det er som har kontrollen. Dette er frå Mosul 4. juni.
Foto: ALKIS KONSTANTINIDIS / ReutersAFPs korrespondent i Beirut, Maya Gebeily skriv på Twitter, at eit samlingspunkt kan vere byen Al Mayadin i Syria.
Men der har krigsfly herja frå lufta i vekevis, for å øydelegge viktige institusjonar og kommandosentralar til IS.
Meir enn 180 sivile skal vere drepne, melder det opposisjonelle nyheitsbyrået SOHR.
Dusør: 25 mill. dollar
al-Baghdadi har vore meldt død mange gangar, sist i 2016, da det vart hevda at ein attentatmann hadde forgifta han.
Det amerikanske utanriksdepartementet har lova ut ein dusør på al-Baghdadi til ein verdi av 25 millionar dollar, om lag 210 millionar norske kroner.
Det er ukjent om nokon har gjort krav på dusøren, og opplysningane om at al-Baghdadi er død er ikkje endeleg bekrefta.
Sivile i krysseld
Truleg regjerte IS over 300.000 sivile i Raqqa. Dei innførte strenge sharialover, og om lag 80.000 har flykta frå byen, skriv AFP.
Men framleis er det i følgje FN om lag 160.000 sivile menneske tilbake i byen, dei manglar elektrisitet og vatn.
Ifølgje ei aktivistgruppe inne i Raqqa har folk blitt samde om ein fast pris på grønsaker, for å hindre at matprisane skyt i vêret.
