– Uveret har utsletta alle framskritt vi har gjort dei siste åra. Alt må byggast opp igjen, sa Vanuatus president Baldwin Lonsdale, då han bad det internasjonale samfunnet om hjelp.
Regjeringa på Vanuatu fryktar overlevande vil gå tomme for mat, fordi dei fleste på øygruppa lever av maten dei dyrkar. No har syklonen øydelagt avlingane deira.
– Eg reknar med at folk har mat i ei veke til, så treng vi å få matrasjonar ut til folk, seier ein talsmann til president Lonsdale til australsk kringkasting.
Redningsarbeidet er i gang
24 personar er bekrefta døde, og rekognoseringsfly frå det australske flyvåpenet sirkler rundt for å greie ut kor store øydeleggingane er.
Naudhjelpsarbeidarar arbeider samtidig med å nå ut til dei mest aude lokalsamfunna på øygruppa. Frykta er stor for at dødstala vil stige om dei ikkje når ut i tide.
– Det er eit desperat behov for vatn, mat og husly. Og vi er spesielt uroa for dei som bur i isolerte lokalsamfunn som ein berre kan nå med båt, sa regionsjef for Røde Kors, Aurelia Balpe.
80 prosent av heimane rasert
Syklonen gjorde mest skade sør på øygruppa.
Blant dei hardast råk øyane er Tanna 20 mil sør for hovudstaden Port Vila. Der skal 80 prosent av bygningsmassen vere knust eller blåst på havet. Sjukehuset er utan tak.
– Det var ikkje berre bygningane syklonen la flatt men også palmetrea, sa Australias utanriksminister Julie Bishop.
Australia har teke leiinga i hjelpeaksjonen, og kallar det ein av dei verste naturkatastrofane som nokosinne har råka Vanuatu.
Regjeringa på Vanuatu fryktar at halve befolkninga kan vere råka av syklonen, det er om lag 130.000 menneske. 3.000 har mista heimane sine.
Telefonlinjene er på veg til å bli reparerte, men framleis er mange av dei 80 øyene på Vanuatu utan telefonforbindelse.