Pakistansk toppolitikar skoten og såra

Det er uklart kva som akkurat skjedde. Rådgjevaren ville ikkje gi detaljar om angrepet på innanriksministeren, men han seier at Iqbal vart treft i armen. Han legg til at skadane ikkje er livstruande.

Malik Ahmed Kahn, talsmann for styresmaktene i delstaten Punjab, seier at Ahsan Iqbal deltok på eit politisk møte i sin eigen valkrins i Narowal-distriktet då eit skot ramma han i den høgre armen.

Overmanna av politiet

– Angriparen skulle til å fyre av eit skot nummer to då han vart overmanna av politifolk og møtedeltakarar, seier Kahn. Mannen som skaut vart straks arrestert. Ahsan Iqbal vart raskt ført til sjukehus i Lahore, der han får behandling.

Motivet for skytinga er ikkje kjent.

Det er venta val i Pakistan til sommaren, og møtet i Narowal var som ei førebuing til valkampen.

Slit med oppslutninga

Det regjerande partiet Den muslimske ligaen (PML-N) har slite med oppslutninga den siste tida, og dei prøver no å reise seg igjen etter fleire store skandalar. Tidlegare statsminister Nawaz Sharif vart fjerna frå stillinga i fjor etter ei avgjerd i Høgsterett, etter at han vart funnen skuldig i korrupsjon.

Han er utestengd frå all politikk på livstid.

Sist månad vart utanriksminister Kawaja Asif avsett av Høgsterett, etter at han vart dømd for brot på dei pakistanske vallovene.