– Operasjonen var ein del av ein større strategi mot ein kriminell organisasjon kjend som «Balkan-kartellet» og leiarane deira frå Vest-Balkan, skriv Europol i ei pressemelding.
Det var etterforskarar frå Kroatia som byrja etterforskinga mot nettverket i 2018, det Europol kallar «Operasjon familia».
Kartellet var mistenkt for å ha smugla narkotika frå Sør-Amerika til Europa ved å bruke privatfly.
Dei skal også ha smugla heroin til Macao og Hongkong med skip, heiter det i kunngjeringa frå Europol.
Den europeiske politiorganisasjonen Europol har laga denne videoen som viser det omfattande politisamarbeidet.
– Ringleiar arrestert i Sveits
Det var i mai politiet slo til ved ein flyplass i Basel i Sveits.
På eit privatfly fann dei 600 kilo kokain og ein viktig ringleiar vart arrestert.
– Mistenkte har ein internasjonal kriminell bakgrunn i Europa og resten av verda, skriv Europol.
I ein parallell politiaksjon vart 421 kilo heroin beslaglagt i Hongkong. Ifølgje Europol var det «Balkan-kartellet» som stod bak smuglinga begge stadar.
Til saman 16 personar er arresterte i «Operasjon familia».
To millionar euro i kontantar (ca. 19 millionar norske kroner), luksusbilar og dyre klokker til ein verdi av ein million euro har også blitt beslaglagt under ransaking i Kroatia, Tsjekkia, Serbia, Slovenia og Sveits.
