Mexico vil deportere 500 migrantar etter grensestorming

Det melder det mexicanske innanriksdepartementet i ei fråsegn søndag kveld, ifølge BBC.

Migrantane, dei fleste frå El Salvador, Guatemala og Honduras, forsøkte å krysse grensa mellom USA og Mexico ved grenseovergangen San Ysidro i California. Der vart dei møtte av tåregass frå amerikanske grensevakter.

Deretter vart heile den travle grenseovergangen midlertidig stengt.

Varslar deportasjon

I fråsegna frå Mexicos innanriksminister heiter det at alle migrantane som er identifiserte, umiddelbart vil verte deporterte.

Vidare heiter det at migrantanes handlingar «langt frå har hjelpt målet deira» og at det heila kunne fått «alvorlege konsekvensar».

Minst 5000 migrantar er samla i den mexicanske grensebyen Tijuana, tett på grensa til det sørlege California. Dei har gått i samla flokk gjennom Mellom-Amerika mot den amerikanske grensa.

Tidlegare søndag gjekk fleire hundre migrantar forbi politisperringane i Tijuana. Dei bar med seg flagg og banner med påskrifta «vi er ikkje kriminelle».

Ordførar ber FN om hjelp

Ordføraren i Tijuana har erklært ein humanitær krise i byen som normalt huser 1,6 millionar menneske. Han har bedt FN om hjelp til å ta hand om dei om lag 5000 migrantane frå Mellom-Amerika som er samla ved grensa.

USAs president Donald Trump har omtala situasjonen som ein «invasjon» og sendt 5800 soldatar til grensa.