– Sjiamuslimar bør drepast, uansett kvar dei er, seier ein ukjent talsmann for den såkalla Najd-provinsen i Saudi-Arabia i eit lydopptak som vart publisert på nett seint fredag.
Najd-provinsen er ei ytterleggåande sunniislamistisk gruppe med band til den sjølverklærte islamske staten, IS. På lik linje med IS, stemplar Najd-provinsen sjiamuslimar som vantro.
Vil utsletta sjiamuslimar
– Den Islamske Staten har bede sine soldatar over alt til å drepe fiendar av islam, spesielt sjiamuslimar, vert det sagt på lydopptaket.
Talsmannen for Najd-provinsen seier også at dei vil bli kvitt alle sjiamuslimar på Den arabiske halvøy.
Opprørsgruppa har også teke på seg ansvaret for to blodige sjølvmordsåtak på sjiamuslimske moskear aust i Saudi-Arabia. Det siste åtaket skjedde fredag, berre sju dagar etter det førre. Til saman vart 25 menneske drepne og over 80 vart såra.
Saudi-Arabia får støtte frå USA
Saudi-Arabia og USA fordømmer åtaka på moskeane. Talsmann for det amerikanske utanriksdepartementet, Jeff Rathke, seier at USA er forplikta til å samarbeide med Saudi-Arabia for å kjempe mot ekstremisme.
– USA støttar den saudiarabiske befolkninga mot slike valdelege handlingar, og me vil halde fram arbeidet med det saudiarabiske kongedømet og våre internasjonale partnarar for å kjempe mot vald og ekstremisme i regionen, seier Rathke.
Saudi-Arabia ledar ein arabisk allianse mot den sjiamuslimske Houthimilitsen i nabolandet Jemen. Det sunnistyrte kongedømmet inngår også i den USA-leda krigen mot IS i Syria.
