Det indiske innanriksdepartementet har tysdag sendt ut ei landsomfattande åtvaring. Ekstra politistyrkar er sette inn til å patruljera bygatene i fleire indiske storbyar, skriv avisa The Telegraph.
Beredskapen er særleg høg i den finansielle hovudstaden Mumbai, som var offer for ein serie terroråtak i november 2008 der minst 166 menneske vart drepne.
Også på flyplassar, togstasjonar og i den populære feriebyen Goa er styresmaktene ekstra årvakne, melder avisa.
Jaktar på fire menn
Det er indikasjonar på at ei terrorgruppe med base i Pakistan vil gjennomføra eit nyttårsåtak, som får indiske styresmakter til å slå alarm.
Sidan fredag har politiet leita etter fire medlemmer av terrorgruppa Lashkar-e-Taiba (LeT), som dei meiner befinner seg i Mumbai.
- LES OGSÅ: Mumbai-politiet jakter terrorister
Fleire stader i byen går sikkerheitsstyrkar no frå dør til dør for å finna dei mistenkte, ifølgje avisa The Guardian.
På vakt etter 2008-terror
India tek sjølv den minste terror trugsel på alvor etter det tre dagar lange åtaket i Mumbai for to år sidan. Den gong var det ein togstasjon, to luksushotell og eit jødisk senter som blei hardast råka.
- LES OGSÅ: Mumbai to år etter
Gruppa som stod bak det grufulle 2008-åtaket var oppfostra av pakistanske sikkerheitsstyrkar til å kjempa mot indiske troppar i konfliktområdet Kashmir.
I september i år slo indisk politi også alarm etter å ha motteke informasjon om at to muslimske terroristar planla eit terroråtak under ein populær hinduisk festival i Mumbai.
Tidlegare i desember vart fleire titals personar såra då ei bombe eksploderte i den nordlege byen Varanasi, som er heilag for hinduane. Militante indiske muslimar vart skulda for å stå bak eksplosjonen.