Høgsterettsdommar Ginsburg innlagd på sjukehus

Den 87 år gamle høgsterettsdommaren Ruth Bader Ginsburg er innlagd på sjukehus med det som kan vere ein infeksjon, opplyser domstolen tysdag.

Ruth Bader Ginsburg

SJUK: Den 87 år gamle høgsterettsdommaren Ruth Bader Ginsburg er innlagd på sjukehus med det som kan vere ein infeksjon, opplyser domstolen tysdag. Arkivfoto.

Foto: Patrick Semansky / AP / NTB Scanpix

Ginsburg vert rekna som ein av dei meir liberale dommarane i høgsteretten i USA. Ho vart innlagt ved Johns Hopkins-sjukehuset i Baltimore tysdag, etter å ha fått feber og frysningar.

Ho har gjennomgått fleire undersøkingar, og «kjem til å vere på sjukehus nokre dagar for å få intravenøs antibiotikabehandling», opplyser høgsterett.

Helsefokus

Helsa hennar har vore eit tema mange gongar.

Ginsburg vart behandla for kreft i bukspyttkjertelen i fjor sommar. I januar sa ho at ho var heilt fri for kreften.

Som ein av fire liberale dommarar, og den eldste i dommarkollegiet, vert Ginsburg sin helsetilstand følgd med argusauge.

Ruth Bader Ginsburg avlegger eden som høyesterettsdommer i 1993.

UTNEMND AV CLINTON: Ruth Bader Ginsburg avlegg eiden som høgsterettsdommar i 1993.

Foto: MARCY NIGHSWANDER / AP / NTB Scanpix

President Donald Trump har signalisert at han ønsker å utnemne ein ny dommar som kan vippe høgsterett i ei meir konservativ retning. Så langt har han fått utnemne to konservative. Får han peike ut ein til, kan fleirtalet verte endra for lang tid.

Eldst i kollegiet

Ginsburg har sete i høgsterett sidan 1993. Ho vart utnemnd som den andre kvinna nokon gong, av president Bill Clinton.

Høgsterettsdommarar i USA sit til dei døyr, eller frivillig går av med pensjon. Ginsburg har trass den høge alderen framleis jobben. Ho er heilt klar over at avgangen hennar kan endre det juridiske landskapet i USA i lang tid.

LES OG:

SISTE NYTT

Siste nytt