Franske bønder blokkerer vegane inn til Paris

Dei franske bøndene har trua med det i fleire veker. Måndag sette dei kursen mot den franske hovudstaden med traktorane sine.

Bondeorganisasjonane ønskjer seg betre arbeidsforhold, lågare skattar, og færre reguleringar, og vern mot billige importvarer.

Hundrevis av traktorar var i sving. Over 55 000 personar skal ha tatt del i demonstrasjonane dei siste vekene. 10 000 bønder demonstrerte måndag.

«Vi kjem ikkje til å døy tause», står det på eit av bannera.

– Vi treng svar. Dette er ein siste kamp for bøndene, sa Karine Duc, ein av bøndene på veg til Paris til France 24.

I 14-tida måndag var 8 hovudvegar blokkerte inn til byen. Rundt heile Paris er trafikken forstyrra.

Første krise som statsminister

Etter fleire veker med demonstrasjonar kom den ferske statsministeren bøndene i møte.

Fredag besøkte Gabriel Attal demonstrantane i Haute-Garonne-regionen.

– Vi har høyrt dykk høgt og tydeleg, sa han til bøndene.

Han lova at dei franske styresmaktene skulle sette jordbruket «framfor alt anna», og gjekk tilbake på å avvikle skatteletten på diesel i jordbruket, og ville ha naudhjelp til bønder som driv organisk landbruk, og gjere vatn meir tilgjengeleg for bøndene.

Attal sa også at Frankrike skulle stemme i mot ein handelsavtale i EU som dei franske bøndene ser på noko som vil føre til urettferdig konkurranse frå Sør-Amerika.

– Vi må seie til alle franske borgarar at om dei som kan bør dei kjøpe franske produkt, sa statsministeren.

Dei to største fagforeiningane for bøndene bestemde seg likevel for å halde fram demonstrasjonane.

Etter eit hastemøte med president Emmanuel Macron og innanriksministeren Gérald Darmanin, blei det bestemt av 15 000 politifolk og militær personale skulle bli sett ut i gatene måndag. Hensikta var å hindre traktorane i å nå bykjernen.

Ifølgje den franske avisa Le Monde skal Attal snakke med representantar frå landbruket måndag kveld.

Han vil komme med fleire tiltak tysdag, etter at fredagens forslag ikkje var tilstrekkeleg for demonstrantane.

Uro i heile EU

Bøndene seier dei er avgrensa av EU og fransk byråkrati, og at tradisjonelt jordbruk er i ferd med å kollapse.

Også i Tyskland demonstrerte hundrevis av tyske bønder måndag. Traktorar blokkerte vegar inn til handelsbyen Hamburg. Dei demonstrerte mot Olaf Shultz sine forslag om fase ut skatteletten på diesel i jordbruket.

I Polen, Romania, Belgia, og Nederland har bønder starta eigne kampanjar.

The Guardian skriv at Arnaud Rousseau, leiaren for FNSEA, ei av det større fagforeiningane i Frankrike, seier at demonstrantane vil halde ut til tysdag. Då skal president Macron møte Europarådet.

Ifølgje avisa viser meiningsmålingane at bøndene har opp mot 90 prosent oppslutning i Frankrike, men at også privatøkonomien er stram. Det fører til at franskmenn ofte kjøper billige importvarer.

Dette vil vere eit viktig tema i EU-valet i juni, der fleire ytre-høgre parti håper å vinne veljarar frå misnøya i jordbruket.