- Eg vil uttrykkje mi alvorlege bekymring for utvekslinga av skot på grensa mellom Israel og Libanon, seier utanrikssjefen i EU, Catherine Ashton.
Ho ber begge partar om å beherske seg, og seier begge må gjere grep for å hindre at sitasjonen utviklar seg, skriv nyheitsbyrået AFP.
Nasrallah vil handle
Hisbollah-leiaren Sayyed Hassan Nasrallah seier gruppa hans ikkje vil stå stille og sjå på om Israel angrip den libanesiske hæren i framtida.
– Den israelske handa som angrip ein libanesisk hær, vil bli kutta av, seier Nasrallah i ein video, ifølgje nyheitsbyrået Reuters.
Han streka under at medlemmene denne gong hadde fått beskjed om ikkje å aksjonere.
– Vi har bede våre væpna medlemmer om å halde igjen, og ikkje gjere noko, seier Nasrallah.
Verst på fire år
Sikkerheitskjelder og vitne seier at situasjonen raskt roa seg ned, men at spenninga framleis var høg etter trefningane, som var dei alvorlegaste sidan krigen mellom Israel og Hizbollah-styrkane i Libanon i 2006.
Også USA og FN har bede dei to landa om å halde tilbake og unngå å gå tilbake til krig.
Ein israelsk general trur ikkje det blir vidare opptrapping.
– Eg trur dette var ei eingongshending. Vi har fått oppmodingar og krav frå høgste hald i den libanesiske hæren om å stanse skytinga, seier generalmajor Gadi Eisenkot.