Politi og redningstenesta rykte ut etter meldingar om ein eksplosjon på eit kjøpesenter i nærleiken av Norrlandsgatan i Stockholm sentrum.
Pressekontakt Carina Skagerlind i Stockholmspolitiet seier til avisa Expressen at noko av fasaden på kjøpesenteret er øydelagt.
– På noverande tidspunkt har vi ikkje fått meldingar om personskadar. Men det er opplagt at noko har eksplodert, seier Sagerlind.
– Kjøpesenteret rista
Meldinga om eksplosjonen kom 18.28. Fleire personar skal ha høyrt eit høgt smell. Ein av dei er Helin Aldur, som var inne på kjøpesenteret Mood.
– Eg var inne på kjøpesenteret med søskenbarnet mitt då vi høyrde smellet. Heile kjøpesenteret rista, seier Aldur til Expressen.
– Folk sprang ut, vi òg. Då såg vi ei stor kvit sky av røyk.
Redningsmannskap forlet staden
Det skal vere glasbitar på bakken, og rutene på ein bil i nærleiken har øydelagte glas.
– Vi har sperra av området og gått inn med teknikarar, seier operasjonsleiar Sven-Erik Olssson hos politiet i Stockholm til Aftonbladet.
Ifølgje Expressen vil redningsmannskapa snart forlate staden.
– Det er ikkje behov for oss her, seier Tony Frank i brannvesenet i Stockholm til Expressen.