Dei fleste igloar er laga av snø, men kameratane frå Tydal i Trøndelag har laga ein isiglo.
Dei fekk høyre at det ikkje gjekk an, og bestemte seg derfor for å motbevise dette.
Det var lokalavisa Selbyggen som omtalte isigloen først.
– Is er godt byggemateriale
Igloen ligg tre kvarter frå bygda til kameratane – dersom du har ein rask snøskuter.
Vanlegvis reiser karane frå Tydal til Essandsjøen for isfiske, men no har dei altså bygd ein iglo av isblokker der. Og den liknar på igloar du berre finn i teikneseriar.
– Vi brukar mykje tid her om vintrane, og så set vi og planlegg litt forskjellig. Dette var eit artig prosjekt som vi hadde lyst til å prøve, fortel Lars Østby Nilsen.
Dei har aldri bygd ein iglo før, men oppdaga raskt at is var eit godt byggemateriale.
– Det er eigentleg veldig fascinerande. Du kan forme isen som du vil, og det er godt med materiale tilgjengeleg. Det blir aldri tomt, seier Østby Nilsen.
Saga ut isblokker frå isen på sjøen
Isblokkene er saga ut med motorsag frå isen på sjøen. Sidan blokkene blei tekne ut på ulike tidspunkt, vart det utfordrande for kameratane å forme isen riktig.
Isen som først var 20 cm tjukk, hadde etter kvart blitt 50 cm.
Men det er likevel eit solid byggverk.
– Heile igloen er klink is. Når det er temperaturforandringar slår isen sprekker gjennom heile igloen. Det er som ein heil konstruksjon, fortel Østby Nilsen.
100 timar med arbeid
Mellom isblokkene har dei blanda snø og vatn til tyntflytande slaps, for å få det til å fryse fast. Det var meir arbeid enn karane trudde.
– Vi har hatt med oss gode hjelparar også. Det var mykje jobb, vedgår kameraten Flemming Lunden.
Han anslår at dei totalt brukte om lag 100 timar på byggverket – fordelt på fem etappar.
Kameratane meiner igloen er ein fin plass å søke tilflukt når det er mykje vind og kaldt ute.
Vil leige ut igloar til overnattingsgjester
Isfiske på Essandsjøen har lange tradisjonar. Det er eitt av dei mest fiskerike vatna i Noreg. Innsjøen vert rekna som eitt av Nord-Europa sine rikaste vatn på fisken røye, men der er også aure.
Ein del av planen er at ein skal kunne sitte lunt inne i igloen og prøve isfiskelukka.
Men duoen har også større planar.
Østby Nilsen og familien driv reiselivsbedrifta Fjellguiden Tydal, som satsar på naturopplevingar.
Dei har allereie sett opp ein lavvocamp i området for å ta i mot turistar og firmagrupper.
Neste vinter vurderer tydalingane å leige ut igloar for overnatting.
– Då er planen å satse kommersielt. Vi kan sette opp fleire igloar, og kanskje leige dei ut til overnattingssgjester, håpar Østby Nilsen.
– Unike overnattingar er ein trend
Mange har latt seg imponere over isigloen i Tydal. Far til Lars, Ketil Østby Nilsen, har funne seg godt til rette inne i igloen.
– Det er heilt utruleg. Dette er det første byggverket av ein sånn karakter her i Tydal. Majestetisk!
Også Kjersti Greger, som er marknads- og kommunikasjonssjef i Trøndelag Reiseliv, rosar initiativet til trønderane.
– Vi har sett ein tydeleg trend dei siste åra, der unike overnattingar har vore av dei mest populære søka på nett når det kjem til reiselivsopplevingar i Trøndelag og Noreg.
Ho trekker fram glasigloen i Verdal som eit godt døme. Denne var svært populær i 2020, og toppa internasjonale lister over spesielle stadar å overnatte på.
– Isigloane kan bli eit unikt tilskot til dei som ynskjer ei annleis overnattingsoppleving, av det meir ekstreme slaget. Dette vil absolutt skilje seg ut som ein eigen nisje for den eventyrlystne målgruppa.
Sjå TV-saka her: