Dømt til fengsel etter kokainfunn ved NTNU
Ein tidlegare student ved NTNU er dømt til fengsel i eitt år og fire månader for 600 gram kokain. Mesteparten vart funne i skapet hans på NTNU i Trondheim i 2021. På hybelen hadde han nesten 200 tusen kroner i kontantar og ein pistol han ikkje hadde våpenløyve for.
Tiltalte forklarte at han tok vare på narkotikaen for ein ven som var i vanskar, og at pengane var lovleg tente. Retten trudde ikkje på han og viser til at det vart funne lynlåsposar med kokain gjort klare for sal.
Åtte månader av fengselstraffa slepp tiltalte å sone om han ikkje bryt lova dei neste to åra.