Det skriv rektor ved skulen, Sten Frode Solvang, i ei intern melding som er sendt ut til alle dei føresette til elevane på skulen.
Totalt er det 55 elevar i 1.klasse. Ti tilsette på trinnet må også i karantene.
– Vi fekk beskjed midt på dagen i dag om at ein føresett har testa positivt på covid-19. Då tok eg kontakt med smittevernkontoret for å høyre kva vi skulle gjere vidare, seier rektoren.
Kan bli kort karantenetid
Smittevernkontoret i Trondheim avgjorde at alle førsteklassingane ved Singsaker skole no skal settast i midlertidig karantene.
– Det vil seie at den er ekstra førebyggande, og at ein ikkje nødvendigvis må vere i karantene i 10 dagar, forklarar Solvang.
Skulen ventar no på testsvaret til barnet av den føresette som er koronasmitta. Eleven var på skulen både måndag og tysdag.
– Vi får nok eit svar relativt raskt, og då vil vi saman med smittevernkontoret vurdere kva som skal skje vidare, seier Solvang.
Søsken og foreldre må ikkje i karantene
Ingen av elevane på første trinn skal møte på skulen onsdag. Førsteklassingane rakk altså berre å gå på skulen i to dagar før dei måtte heim igjen.
Skulen presiserer at ingen søsken eller foreldre må i karantene.
– Det er berre andre skuledag. Fryktar du meir nedstenging framover?
– Ja, det fryktar eg. Eg håpar sjølvsagt at det skal gå bra, men slik smittesituasjonen er no kan dette skje på alle skular, meiner rektoren.