Wilma (10) spelar amerikansk fotball: – Ein må gi full gass og vere sterk

– Eg er best på å takle dei høgaste gutane!

Det seier ti år gamle Wilma Pedersen. Ho speler på Alta Snow Dragons, som er Europas nordlegaste amerikanske fotballag.

Laget består av rundt ti tenåringsgutar, og Wilma, som er eitt hovud lågare enn resten. Akkurat det siste gjer ingenting, skal ein tru tiåringen.

– Det er viktig å ikkje nøle i den sporten. Ein må gi full gass og vere sterk, forklarer Wilma.

Reiste på turnering

Alta Snow Dragons var nyleg på den første turneringa si nokon gong. Her gjorde laget ein god figur, og vann mellom anna mot Lillestrøm. Med Wilma på banen.

– Det var veldig artig at vi vann ein kamp, mot så gode motstandarar. Eg håper å få dra på fleire turneringar.

Amerikansk fotball er kjend for høg intensitet og mykje taktikk. Sjølv jobbar Wilma framleis med å finne ut av taktikken.

– Eg er ikkje så god på posisjonane enno, så eg høyrer berre på kva trenaren seier. Det er eigentleg berre å køyre på.

Tiåringen seier amerikansk fotball er eit fint utløp for aggresjon.

– Eg har ikkje hatt det så fint på skulen, og eg liker å herje. Så eg fann ut at det var ein fin sport for meg, seier Wilma.

Lèt seg imponere

På treninga i Alta har dei fått besøk av Uno Brevik Olsen. Han er forbundstrenar i Noregs Amerikanske Idretters Forbund, og har late seg imponere av det Wilma gjer på banen.

– Det viktigaste i denne sporten er mindsett, og Wilma har det som trengst. Ho kan komme så langt ho vil.

Olsen meiner det ikkje er noka ulempe for jenter å delta i amerikansk fotball.

– Jentene har ofte litt meir kraft enn gutane. Viss Wilma held fram med sporten, blir ho ein person vi kjem til å sjå mykje av.

Trenar med pappa

Ståle Eriksen er far til Wilma. Han bidreg som støttespelar både frå sidelinja og på styrkerommet.

– Vi har trena litt styrke saman, men eg veit ikkje kvar ho har det med amerikansk fotball frå. Eg støttar henne i det.

Sjølv om Wilma er minst på laget, er ikkje faren uroa for at ho skal få seg ein trykk.

– Nei, det er eg ikkje. Ho er litt fysisk, og synest det er artig å kunne bryte litt. Det passar for henne.

Inspirerande

Alta Snow Dragons starta opp i 2020, etter initiativ frå tidlegare landslagsspelar Glenn Hochlin Larsen. Han er trenar for laget, og seier at det faktisk kan vere ein fordel at Wilma er lågare enn dei andre.

– Ein pleier å seie at lågaste mann vinn. I dette tilfellet blir det lågaste kvinne, fordi ho har lågare tyngdepunkt, og kan lettare takle dei andre spelarane.

Larsen håpar Wilma kan inspirere andre jenter til å teste ut sporten.

– Ho viser at det er fullt mogleg for jenter å vere med i sporten, og det treng vi for å kunne vekse. Wilma er eit førebilete.

Sjølv om ho ikkje har tenkt så mykje på framtida, har ho ingen planar om å slutte med det første.

– Målet mitt er å bli betre i sporten, og ha det artig samtidig.

Sjå Wilma in action her: