– Det er første gong eg er her. Det er ein veldig vakker stad, seier Andi Arsyil Rahman Putra.
Han er skodespelar heime i Indonesia, men har tatt turen til Tromsø på ferie. Med eit søk på Google fann han ut at det var dit han skulle dra.
– Eg ville ha snø, samar og reinsdyr, seier han.
Putra fortel at han har vore på nordlystur, men fekk ikkje sjå så mykje. Han visar likevel stolt fram det vesle som viste seg på himmelen.
Indonesiaren har vore opp Fjellheisen og prøvd seg på norsk mat. Alt blir delt med dei 1,1 millionane som følger han på Instagram.
Men det er fleire enn Putra som har funne ut at Tromsø er ein stad dei har lyst til å dra. «Nordens Paris» hadde i november flest bestillingar og høgast rompris blant dei 13 største hotellbyane i landet. Det viser tal fra Benchmarking Alliance
Turistar frå heile verda
– Det spesielle med dei siste par åra er at prisane har stige mykje. Kombinert med høgt rombelegg blir det svært gunstig for hotella på vinterstid. Men me må ikkje gløyme at prisane på varar og tenester hotella kjøpar inn har stige til dels enormt, seier Peter Wiederstrøm i Wiederstrøm Hotel Consulting.
Desember ser også veldig bra ut, ifølge Wiederstrøm. Han regnar med at Tromsø vil toppe alle lister, men understrekar at dei enno ikkje har offisielle tal.
Direktør på Scandic Ishavshotell, Poul-Henrik Remmer, er veldig glad for at det er tilbake til slik det var før pandemien.
– Det er spennande å sjå at turistane er tilbake, og at dei verdset Tromsø som ein vinterdestinasjon, seier han.
Remmer fortel at dei har sett ein utvikling over tid på bookingane som har kommen inn, og at aukinga kom fortare enn dei kunne håpet.
Turistane kjem stor sett frå heile verda, men spesielt mange kjem frå Vest-Europa.
– Me har også sett ein auking hos golfstatane og dei arabiske landa. Det er kanskje ein ny marknad me kan sjå fram til å årane framover, fortel Remmer.
På jakt etter nordlys
Felles for fleire av turistane NRK møter på i Tromsø, er at dei er på jakt etter «the Aurora».
Familien Edwards på fire frå Cape Town i Sør-Afrika har nettopp kommen til Tromsø etter å ha vore i Oslo ei veke. Dei har spart i eit år for å komme seg nordover.
– Me skal vere her i to dagar. Me skal gjere alle turisttinga Tromsø har å tilby, seier far John.
– Men me kom hit hovudsakleg for nordlyset, for det er ein ting me gjerne vil sjå, legg sonen Luke til.
Aurora Liu og Xing Xu er begge frå Kina, men studerer i England. Dei har dratt til Tromsø for å markere at studietida deira snart er over.
– Tromsø er mitt topp ein stad å reise til. Det er nordlys og vakre omgivnader, seier Liu.