– Det går utover kvaliteten på tilbodet til meg og andre på min alder, og sjansen til å utvikle seg, seier Sigurd Larne Tolk i Vadsø.
15-åringen er aktiv i kulturskolen og trivst godt.
Han synest det er trist at kommunedirektøren foreslår kutt i fleire tilbod for barne- og unge i Vadsø.
Kuttet er meint å dekke inn delar av eit underskot på 50 millionar kroner.
I økonomiplanen for dei fire neste åra blir det foreslått kutt i ikkje lovpålagde tenester som blant anna er kulturskolen, ungdomsrådet og ungdomsklubben i byen.
Tolk seier han har hatt god nytte av kulturskoletilbodet dei mange åra han har vore med.
– Eg har hatt det veldig gøy og fint på kulturskolen. Eg har gått på kunst, piano og nå slagverk.
Sigurd Larne Tolk, og kulturskole lærer Jan Hofseth er begge bekymra for kuttforslaget i kommunen. Blir kutta vedtatt kan kulturskolen ende opp med berre ei stilling igjen.
Foto: Hanne Wilhelms / NRKFærre stillingar ved kulturskolen
Vadsø kommune skal denne veka ta stilling til kuttforslaga, før saka skal til endeleg behandling i kommunestyret 14. november.
Jan Hofseth er kulturskolelærar og tillitsvald for dei tilsette.
Han trur kutta vil gjere at kulturskolen berre vil klare å kunne levere tenester på eit minimumsnivå.
– Det kan jo føre til at vi berre får ei stilling igjen her, men kva den skal gjere er vanskeleg å seie.
Jan Hofseth, lærar og tillitsvald i kulturskolen har i eit skriv til politikarane forklart kvifor det er viktig å ha kulturskolen. Han seier kulturskolen bidrar aktivt i musikklivet i byen.
Foto: Hanne Wilhelms / NRKPå førehand har kulturskolelæraren sendt eit skriv til politikarane i Vadsø kommune der han meiner kutta vil få store konsekvensar for kulturlivet i byen.
– Vi underviser barn og unge og gjer dei i stand til å delta i kulturlivet i byen som vi er sterkt involverte i, både i grunnskolen, kunstforeininga og musikklivet i byen.
Krevjande situasjon for mange kommunar
Kommunedirektøren i Vadsø, Jarle L. Lystad, forstår at kutta skaper reaksjonar.
Han seier den tøffe tida i kommune-Noreg gjer at også Vadsø må gjere grep.
– Den økonomiske krisa som treff kommunane i landet treff også Vadsø hardt. Hovudårsaka er auka utgifter innan helse- og omsorgssektoren.
Han seier heile organisasjonen skal omorganiserast.
– Dei nye effektiviserings- og omstillingstiltaka vil treffe innanfor helse- og omsorgssektoren, men også oppvekst- og levekårssektoren, som i stor grad omfattar barn og unge.
Kommunedirektør i Vadsø kommune Jarle L. Lystad forstår at dei føreslåtte kutta ikkje er populære. Men han seier den krevjande situasjonen i kommun-Noreg også gjer at Vadsø må ta grep.
Foto: Alexandra Bråten / Rådhusets forvaltningstjeneste– Vi kan ikkje skjerme barn og unge heilt
Ordførar i Vadsø Wenche Pedersen seier det er vanskeleg å skjerme tilbodet til barn og unge.
– Det kjem til å smerte når vi må ta igjen eit underskot på 50 millionar. Vi kan ikkje skjerme barn og unge heilt, men det er i alle fall dei tinga vi skal jobbe med.
Ho trur kommunedirektøren har gjort grundige vurderingar i kuttforslaga sine.
– Eg trur kommunedirektøren har gått gjennom heile organisasjonen og sett på kva slags moglegheiter det er for kutt.
Ordførar i Vadsø Wenche Pedersen (Ap) trur kommunedirektøren har gjort grundige vurderingar i kuttforslaga sine. Ho seier folk må forstå at kommunen må omorganisere drifta.
Foto: Hanne Wilhelms / NRK– Mindre gøy å bu i Vadsø
Dersom forslaget til kutt blir vedtatt trur Sigurd Larne Tolk at det vil bli mindre attraktivt å vekse opp i Vadsø.
– Kuttar ein i kulturskolen og legg ned ungdomsklubben blir det lite igjen. Det blir mindre gøy å bu i Vadsø, for vennene mine synest det er fine møteplassar.
Sigurd Larne Tolk forstår at kommunen må gjere endringar for å berge økonomien. Han fryktar likevel for bu- og blilysta om kuttforslaga blir vedtatt.
Foto: Hanne Wilhelms / NRKHan seier han forstår at kommunen må kutte for å få økonomien i balanse, men meiner det handlar om prioriteringar.
– Ein må prioritere det folket bruker mest og heller kutte i tilbod som ikkje er like populært. Mange barn og unge trivst her, eg meiner ein må skjerme kulturskolen.
