– Det var eg som gav beskjeden, det er eit gjentakande problem at folk lèt barna sitte på fanget når dei køyrer om bord. Dei tenker ikkje på kva som kan skje og at dei har ei kollisjonspute i rattet.
Det seier overstyrmann på MF «Folkestad», Oddbjørn Jenssen, til avisa iTromsø.
Ifølge mannskapet på båten, hender det at bilane dultar borti kvarandre.
– Det skjer kanskje ikkje så ofte, men når det skjer at dei smellane saman så kan kollisjonsputa utløysast, seier overstyrmann Julian Storsteinnes til iTromsø.
– Ikkje tilstrekkeleg fokus
Ifølge skipperen på ferja, Kent Evertsen, er ikkje utløysing av kollisjonsputa det einaste som kan skape farlege situasjonar på ferja.
– Trafikkreglane gjeld også når ein køyrer om bord i ei ferje. Dei som har ungar på fanget har heller ikkje tilstrekkeleg fokus på køyringa, seier han til iTromsø.
Kan få bot
Dette skriv politiet om kva som er reglane for sikring av barn i bil:
«Barn som er lågare enn 135 cm, skal bli sikra med sikringsutstyr som er tilpassa vekta til barnet. Sjåføren har ansvaret for at barn under 15 år er lovleg sikra. Sjåføren vil få førelegg (bot) og to prikkar om vedkommande blir tatt i ein kontroll. Førar med prøveperiode, får fire prikkar.
Ein usikra eller feilsikra person kan bli alvorleg skadd sjølv om farten er låg. Det er derfor viktig alltid å sikre barn og vaksne. Dette gjeld også på korte turar, for eksempel til barnehage eller skole.»
