– Stadig fleire spør etter økologiske varer, og det må me ta på alvor, seier inspirasjonsbonde Per Arne Hoppestad.
– Eg er superoptimist, og har tru på at det også økonomisk er ei framtid i dyrking av reine og sunne varer.
Per Arne Hoppestad i Skien er ein av 30 inspirasjonsbønder som skal ut og tenne gnisten hjå kollegaer i landbruket. Til veka skal Hoppestad fortelje om sin økologiske produksjon på eit inspirasjonsseminar på Århus forsøksgard i Skien.
Les også:
Guddommeleg te og helsefremjande spirer
På Hoppestad i Skien produserer Hoppestad saman med ein kollega noko dei kallar "guddommeleg te" inspirert av ein eldgamal livseliksir frå Asia som heiter KOMBUCHA. I tillegg lagar dei ei rekkje grønsakspirer som skal vera overmåte sunne.
Hoppestad er ein av dei store grønsaksprodusentane i landet. Dei driv stort med konvensjonell grønsakproduksjon, men legg meir og meir over til økologiske grønsaker og spirer.
Nytt av året er den "guddommeleg teen". Te frå Kina miksa med bakteriekulturar frå Skien og Norge gjev ein eplesideraktig lett gjæra drikk som i følgje Hoppestad er eit veldig godt alternativ til brus og andre leskedrikkar.
– Med ei flaske kombucha om dagen har du sikra deg mykje av den næringa og vitamin som kroppen treng, påstår Hoppestad.
Ei framtid i økologisk produksjon
– 30 bønder over heile landet er plukka ut og spurt om dei er viljuge til å dra rundt og gje praktiske råd og hjelp til bønder som vurderer å gå over til økologisk produksjon, seier Aina Bartmann, leiar for Økoløft.
Gjennom eit historisk samarbeid i landbruket har sju store organisasjonar gått saman om å få til eit korps av inspirasjonsbønder.
– Forbrukarane spør etter meir økologiske varer. Det langsiktige målet med dette prosjektet er at me skal kunne halde tritt med etterspurnaden, seier Bartmann.
– Verda endrar seg, det må me også gjera, seier inspirasjonsbonde Per Arne Hoppestad.
Han meiner innovasjon handlar om å utvikle seg, ikkje vera redde for å prøve nye ting.
– Eg trur det ligg ei framtid i økologisk grønsakproduksjon, avsluttar Hoppestad.