Ragnvald Christenson i Haukeli meiner det går føre seg ein skjult kamp om å bli hovudvegsambandet mellom Aust- og Vestlandet.
– E 134 er bevisst gløymt av Vegvesenet, hevdar Christenson.
Han meiner at vegen er så dårleg skilta både frå Bergen og Oslo at bilistane vel Riksveg 7 eller E 16 i staden.
Han viser til at alle løyvingar til riksvegar er tufta på årsdøgntrafikk, og den vegen som får størst årsdøgntrafikk har også størst sjanse til å få mest pengar.
– Klarar dei å skilte vekk E 134, slik at den får mindre årsdøgntrafikk, så tapar den i konkurransen mot E16 og Riksveg 7, seier Christenson.
Les og:
Nytt for vegvesenet
Men Vegvesenet avviser dette argumentet.
– Det var nytt for meg, seier ein lettare overraska Arnfinn Ansok.
Han er sjefingeniør i Statens vegvesen region vest og fortel om omfattande planar for E 134 over Haukelifjell.
– Det blir arbeidd med ein reguleringsplan som kortar ned strekninga med 11 kilometer og to lange tunnelar som tar vekk høgdeforskjellar, seier Ansok.
Han meiner det vil skape ein Europaveg med god regularitet, og at det vil bli ein heilt ny veg når det kjem på plass.
– Og eg håpar det ikkje tar alt for lang tid, seier Ansok.
Les og:
Viktig for Haugalandet
Ragnvald Christenson er uroa, sjølv om dei fleste veit om riksvegalternativa dei kan velje mellom Aust til Vest og ikkje treng skilt for å finne fram.
– Men kvifor er den eine vegen så intenst godt skilta, mens den andre ikkje er det?
Arnfinn Ansok i vegvesenet vil ikkje peike på kva for veg som bør vere skilta som hovudfartsåre.
Han viser til at for dei som bur på Haugalandet er E 134 ein utruleg viktig veg. Og for tungtransporten mot det sentrale Austlandet er den svært viktig.
– Vegen over Haukeli er i mine auge ein svært viktig veg. Eg skal ikkje prøve å rangere dei, seier Ansok.