– Dei må ha krystallklare linjer, ellers blir det gnisningar i klubben. Det blir veldig utfordrande.
Det seier fotballskribent Joacim Jonsson om det komande samarbeidet mellom Ronny Deila og Kjetil Rekdal. Trenarskriftet i Vålerenga blir av den uvanlege sorten. Det er den noverande trenaren som sjølv har henta inn sin erstattar, medan han går over i ei anna rolle i klubben.
Jonsson meiner likevel at det var på tide at noko skjedde i klubben.
– Per i dag er ikkje Vålerenga ein klubb. Det er ingenting. Dei er i djup krise på alle områder.
Ein av grunnane til at Rekdal no velger å gje seg som trenar, er nettopp fordi han vil få klubben på ein ny kurs.
– Det har vore ein kamp sidan 2013 for å halde dette flytande. Me trengte hjelp for å få det til. Forhåpentlegvis har me funne løysinga på dei problema som har vore der.
– Eit synkande skip
I dag blei det klart av Deila tek over som ny trenar i Vålerenga og at Kjetil Rekdal går over i rolla som sportsleg administrativ leiar. Å få inn Deila var det beste alternativet, meiner Jonsson.
– Vålerenga er eit synkande skip og dei må reparere det skipet. No er det gjort. Deila er den einaste trenaren på marknaden som kunne gjere det. Alle andre hadde vore eit skuldertrekk.
Likevel trur han det må vere klarare linjer mellom Rekdal og Deila enn det Vålerenga gav uttrykk for i dag.
– Det verkar lite konkret kven som har kva ansvarsområde. Eg trur ikkje Rekdal skal ha sportsleg ansvar, det verkar urealistisk.
Han får støtte av tidlegare Vålerenga-spelar Vidar Davidsen.
– Dei må ha ein klar rollefordeling, og ikkje tråkke i kvarandres bed.
Også sportssjef i den israelske storklubben Maccabi Haifa, Tor-Kristian Karlsen er skeptisk til den nye ordninga.
I tillegg til det reint organisatoriske, meiner også Davidsen at det personlege må fungere mellom dei to.
– Det er det spennande å sjå her. Dei må finne tonen, og det er umogleg å spå.
– Har stor tru
NRKs fotballekspert Lise Klaveness trur at samarbeidet kan fungere, so lenge Rekdal klarar å sleppe taket.
– Eg har i utgangspunktet stor tru på prosjektet, men utfordringa blir for Rekdal å sleppe taket han har hatt på spelargruppa slik at Deila får vere sjefen over det sportslege.
Jonsson meiner også at Rekdal må overlate det sportslege ansvaret til Deila.
– Han har ikkje noko val. Han må trekke seg, og lære seg å spele andrefiolin.
Les kva Deila og Rekdal sjølv sa om samarbeidet her.