I løpet av halvanna minutt vil Kjetil Jansrud vere ferdig med fredagens viktigaste arbeidsoppgåve. Då kan standarden vere sett for den største verdscuphelga i 29-åringens liv.
Kitzbühels beste mann på samtlege utfortreningar er ein av favorittane til å vinne Super-G rennet i superkombinasjonen.
Men skal han bli konge må han vinne i det som blir kalla verdas farlegaste utforrenn. Super-G-løypa krev sin mann, men den fysiske og psykiske stortesten finn stad i enorme «Die Streif» laurdag.
– Pulsen går allereie før eg er i gang. I enkelte periodar under rennet vil eg tippe at pulsen min ligg opp mot maks, som er ca. 200. Truleg har eg kanskje opp mot 190 i puls, seier OL-vinnaren frå Sotsji.
Mentalt utslitte
I tillegg er det å førebu seg til dei to avgjørande minutta i løypa med enorme hopp og stupbratte heng ei stor mental påkjenning, fortel austerrikske Georg Streitberger.
– Det er vanskeleg. Du konsentrerer deg knallhardt heile dagen for å køyre i kun to minutt, seier Streitberger og hevar augebryna.
– Det er vanskeleg. Du konsentrerer deg knallhardt heile dagen for å køyre i kun to minutt, seier Streitberger.
Foto: DOUG PENSINGER / AfpDette er det brutale rennet der «alle» er fornøgde med å bare gjennomføre, fortel tidlegare landslagstrenar Marius Arnesen.
– Utøvarane er er gira når dei kjem, men letta og mentalt utslitte når dei er ferdige. Folk er letta når dei reiser herifrå, sjølv om dei hamna på 30-plass, seier Arnesen.
– Nær full lungekapasitet
Det er torsdag føremiddag. På klink is susar Jansrud gjennom løypa. Det går i langt over 100 kilometer i timen frå start til slutt. Og dette er bare treningsrenn, men likevel er den store tribunen i målområdet fylt opp av fleire tusen alpintelskarar som gispar i det nordmannen forserer «Die Streif» raskare enn konkurrentane.
For å suse ned til bestetid i Hahnenkammrennet må ein også ha stor lungekapasitet, fortel Jansrud.
– Eg veit at dei har målt oksygenopptak på utøvarar i løypa. Vi brukar nesten full lungekapasitet når vi køyrer her, så vi blir slitne.
– Det viser kor viktig det er å ikkje bare vere sterk, men også ha eit høgt oksygenopptak. Løypa her gjev gode svar på kva ein må ha for å vinne eit utforrenn, seier Jansrud.
Men ikkje kva som helst utforrenn. Denne dagen skal Jansrud ha alt og meir til for å stå igjen med bestetid. Sjølvtillit, styrke, fart og lungekapasitet i det eine alpintkonkurransen som gir evig heltestatus samme kva du presterer etterpå.
Først ventar riktig nok eit Super-G-renn på halvanna minutt, så eit påfølgande slalåmrenn, som er ei slags overtidsøkt før galskapen går i gang framfor 50-60.000-fans ved foten av det enorme Hahnenkammfjellet.
