Russland tapte anka i CAS - ingen friidrettsutøvarar til OL

68 utøvarar anka dommen frå det internasjonale friidrettsforbundet (IAAF) om utestenging, men tapte i dag ankesaka i CAS.

CAS melder at avgjerda vart tatt for å «gje like føresetnadar for utøvarane».

– Tusen takk for denne gravferda for friidretten, seier stavhoppar Jelena Isinbajeva til nyheitsbyrået TASS, melder Reuters.

Isinbajeva står med to OL-gull og ein bronse i stavsprang frå dei tre siste olympiske leikane.

Verdas raskaste mann, Usain Bolt, sa dette om avgjerda.

– Viss ein har juksa er det berre å gje ein slik beskjed og vise at det får konsekvensar, seier Bolt, som ikkje ville svare på om det var ei rett eller feil avgjerd.

• Les også: IOC støtter russisk utestengelse
• Les også: Russisk dopvarsler har fått OL-ja fra IAAF

Russland rasar

Sportsminister i Russland, Vitalij Mutko, er lite nøgd med avgjerda.

– Etter mitt syn er dette ein subjektiv og politisk avgjerd som ikkje har eit rettsleg grunnlag, seier Mutko ifølge det russiske nyheitsbyrået TASS.

Etter at det vart avdekka systematisk doping i russisk friidrett i fjor, oppfordra verdas antidoping byrå (WADA) IAAF å utestengde Russland frå alle internasjonale stemner. Avgjerda vart anka, men den vart avvist i dag.

Tidlegare i veka kom rapporten som hevdar å bevisa statleg systematisk doping i fleire idrettar, og no truar IOC med å utestengde heile Russland frå OL.

Den saka er forventa avslutta i løpet av den neste veka.

Berre to får delta

– Medan vi er takknemleg for at våre reglar og vår oppfordring har blitt støtta av CAS, er dette ingen gledas dag. Eg tok ikkje steget inn i sporten for å hindre utøvarar frå å konkurrera. Vi vil halde fram arbeidet med Russland for å laga eit dopingfritt miljø for utøvarane deira, slik at dei kan returnera til den internasjonale arenaen, melder IAAF-president Sebastian Coe i ei pressemelding.

– Eg syns det var ganske klart og eg trudde ikkje dei hadde ein sjanse. No er det bestemt at friidrett ikkje får delta, men eg trur ikkje dette kjem til å påverka avgjerda til IOC med tanke på å utestengde alle russiske utøvarar, seier president i det europeiske friidrettsforbundet, Svein Arne Hansen.

Julia Stepanova får delta under nøytralt flagg, sidan ho varsla om systematisk doping i russisk friidrett. I tillegg har den Florida-baserte lengdehopparen Darya Klishina fått klarsignal av IAAF.