Skammar seg over skrekktal: – Det er vondt å snakke med folk om det

Sju kampar. Ti timar. Så lenge har det har gått sidan Røa sist sette ballen i motsett nett.

Spiss Tuva Lotte Leschbrandt Espås har ikkje skåra sidan 3. juni, og makkar Julie Hoff Klæboe – som no er skadd – har gått sidan 24. juni utan ei nettkjenning. Det er ei hard pille å svelgje for spissparet.

– Det er vondt å høyre sånne tal, og det er vanskeleg å setje fingeren på akkurat kva det er som skjer, seier Espås.

Dei to spissane blir målte etter kor mange mål dei produserer. Når det buttar imot, ser dei fordelen av å vere to saman om det.

– Det er vondt å snakke med folk om det, opnar Klæboe.

– Synest du det er flautt?

– Ja, absolutt, stadfestar 24-åringen overfor NRK.

Laurdag gjestar Røa tabellnabo Stabæk. Kampen ser du på NRK 1.

– Hadde ikkje lyst til å stå igjen etter trening

I podkasten «Meir enn 4-4-2», fortel Klæboe om den frustrerande tida i Kolbotn – klubben ho spelte for før ho gjekk til Røa. Der skåra ho totalt elleve mål på fem sesongar.

– Du føler at det står skrive i panna di, at du er: «Spissen som ikkje skårar mål». Eg hadde ikkje lyst til å stå igjen og øve på det eg var dårleg på, eg ville ikkje vise det til dei som spelte på laget mitt, fortel ho ærleg i podkasten.

Røa starta sesongen bra. Dei to lagvenninnene ser tilbake på ein vår kvar laget var i godt driv og hadde litt stong inn – heilt til medgangen stoppa opp.

– Eg drit i kven som skårar

Trenar Geir Nordby må innsjå fakta – laget har ikkje skåra sidan juni. No vil han at laget skal opne målkontoen igjen, men han legg ikkje alt presset på spissane.

– Eg drit i kven som skårar, berre laget skårar. Det er eit lagspel vi held på med, fortel han.

Nordby trur det er i ferd med å losne litt, og han har fokus på å ufarleggjere, og å få spelarane til å tore og prøve.

– Det er verre ting i verda enn ikkje å skåre mål akkurat no. La oss sleppe oss laus og ha det gøy, det er derfor vi er her, avsluttar han.