Arteta møtte pressa framfor Premier League-møtet med Fulham laurdag. Der vart ikkje overraskande, den norske landslagskapteinen eit tema.
– Han vil vere ute i fleire veker. Ingen bestemt dato er sett for når han kjem tilbake. Men han utviklar seg bra. Det er veldig uheldig det som skjer med han, sa Arteta.
– Det kan vere (fråvær til etter landslagspausen), men vi må sjå korleis ting utviklar seg, korleis kneet hans kjennest. Det er for tidleg å gi eit svar, sa han.
– Vi deler ikkje
Ødegaard pådrog seg ein leddbandsskade i kneet mot West Ham for to veker sidan.
– Eg trur han vil vere tilbake om nokre veker, sa Arteta fredag.
Ødegaard var ikkje med i Noregs landslagstropp som slo Israel 5–0 i VM-kvalifiseringa og spelte uavgjort (1–1) mot New Zealand. Han møtte likevel opp og var ein del av gruppa før og etter Israel-kampen.
Måndag melde BBC at Ødegaard ikkje vil vere tilbake i spel før neste landslagspause i midten av november, utan at det var nokre opne kjelder som stadfesta dette.
– Arsenal har all kommunikasjon. Vi deler ikkje, skreiv Noregs landslagslege Ola Sand i ein SMS til NTB tidlegare denne veka.
Fleire skader
Ødegaard har i tillegg til kneskaden vorte sett på sidelinja i periodar denne hausten med ein skade i hofta og i skuldra.
Noreg møter Estland på Ullevaal 13. november, og med siger i den kampen er VM-billetten så å seie i boks. Berre eit stortap mot Italia kan då forhindre gruppesiger. Møtet med italienarane på San Siro tre dagar seinare er den siste kampen i VM-kvalifiseringa.
Etter Arsenals møte med Fulham laurdag ventar Atlético Madrid (Champions League), Crystal Palace, Brighton (ligacup), Burnley, Slavia Praha (Champions League) og Sunderland i det svært tette kampprogrammet.
(NPK)
