Ulukkesfuglen Helene Olafsen etter å ha tryna frå OL-medalje i 2010. No vrakar ho boardercross og satsar stort mot slopestyle.
Foto: Poppe, Cornelius / Scanpix
Olafsen har planar om å kopiere X-games-vinnar Torstein Horgmo.
Foto: JED JACOBSOHN, Jed Jacobsohn/Getty Images/AFP / AFPI juni opplevde Helene Olafsen sitt verste mareritt då ho rauk korsbåndet på trening med snowboard-landslaget.
– Eg høyrte at det knakk, og såg at beinet gjekk ut av stilling. Eg låg på golvet og skreik og skreik, og skreik. Då tenkte eg: «No sluttar eg». Då var eg dritlei. Det var mitt verste mareritt å ryke korsbåndet, seier Olafsen.
- LES OGSÅ:
Dermed gjekk alle forventningar i grus for andre gang på under eit år. I januar brekte ho foten og var ute av stand til å forsvare VM-gullet i boardercross. I juni måtte ho sjå at 2011-sesongen med VM på heimebane og X-games gjekk fløyten.
Og medan snowboardlandslaget i desse dagar reiser til USA for å spisse formen fram mot ein stor vinter med potensielt mange triumfar, må Olafsen terpe på alternative øvingar i Norge.
– Eg prøver å følge litt med på kva dei andre gjør, men ikkje mykje. Eg orkar rett og slett ikkje å sjå på all moroa dei får oppleve, seier Olafsen.
– Ikkje alle hadde klart å komme gjennom skademarerittet
På toppidrettssenteret er heile laget samla under fellestrening. Litt vekke frå dei andre held Olafsen på for seg sjølv. Vegen tilbake til brettkøyringa er tung og lang.
– Eg hadde nok tenkt det samme som Helene, seier landslagstrenar Per Iver Grimsrud.
– Å vere i Norge medan vi dreg til USA er tøft og hardt. Det er ikkje alle som hadde greid å komme seg gjennom eit slikt skademareritt, legg han til.
Men no har Olafsen lagt frå seg tankane om å legge opp.
– Det var ganske jævlig i starten. Eg hadde det ikkje veldig bra. Men det er jo ein prosess. Plutseleg er ein gira igjen. Det er dette eg vil halde på med. Eg er ikkje ferdig, seier den målretta VM-vinnaren.
På den lange vegen tilbake lar ho seg inspirere av ein av snowboardsportens største stjerner, Torstein Horgmo.
– Han brekte ryggen i sommar og kom sterkare tilbake. Eg tenkte eg skulle kopiere han, seier ho med eit smil.
Silje Norendal blei igjen etter fellesøkta på Olympiatoppen for å prøve ut Helene Olafsens monotone øvingar.
Vil gå frå verdstoppen til midt på treet
Det tunge arbeidet vil ikkje vere over, sjølv om skadeperioden truleg går over utpå nyåret.
For ei av dei beste boardercross-kvinnene i verda skal forlate snowboardsportens alpint-grein til fordel for slopestyle, der konkurransen bare blir tøffare og tøffare.
Den totalomvendinga gjør ho med høge mål i tankane.
– Eg skal ikkje lyge. Det blir tøft, og det er ikkje gjort over natta å bytte grein. Ein er vand med å vere best i boardercross, så går ein til å vere heilt midt på treet i slopestyle. Det har eg ikkje lyst til å vere særleg lenge.
– I slopestyle-toppen om kort tid
På landslaget reknar dei med å sjå Olafsen bryte seg hurtig inn i toppen.
– Det er veldig viktig for kvinne-snowboard at ho er med vidare. For hennar del er ikkje vegen til toppen veldig lang. Ho veit å ta dei riktige vala, og er ei dame som kan gjøre det stort i slopestyle-sirkuset, seier Grimsrud.
Men før det må ulukkesfuglen halde fram med å bite i det sure eplet, og satse på at skademarerittet snart er slutt.
