Northug om Skiforbundets krav: – Uforståeleg og urimeleg

Team Northug avviser at det er den mykje omtala kleskolleksjonen som er årsaka til at Petter Northug nøler med å signere avtalen som sikrar VM-plass. No kranglar partane om fire lukrative veker etter sesongen.

Petter Northug

I TENKEBOKSEN: Petter Northug er oppgitt over Norges Skiforbunds krav om at han skal representere landslaget og ikkje Coop etter 15. mars.

Foto: Alley, Ned / NTB scanpix

– Eg skal til VM, sa Petter Northug, som feia all tvil til side overfor NRK i oktober.

– Eg reknar med at forhandlingane rundt avtalen med Norges Skiforbund går i orden. Eg brukar ikkje så mykje energi på å tenke på det, sa Northug.

Men på nest siste dag før fristen er det fortsatt usikkert om Petter Northug signerer landslagsavtalen som gir skiesset lov til å gå VM i Falun i februar.

Årsaka: Kampen om kven Northug skal representere like etter at han har tatt siste stavtak i verdscupen.

– Det er ikkje kleskolleksjonen som er grunnen til at Petter ikkje har skrive under avtalen med NSF enno. Det er kun sluttdatoen som Skiforbundet har sett for representasjonsperioden, som gjør det vanskeleg, fortel Northug gjennom manager Are Sørum Langås til NRK.no.

Petter Northug

Petter Northug er denne veka på høgdetrening i Val Senales.

Foto: Poppe, Cornelius / NTB scanpix

Strid om fire lukrative veker

Petter Northug krev å få representere Coop etter sesongavslutninga i Holmenkollen 15. mars 2015.

Det går ikkje Norges Skiforbund med på.

– Petter synst det er uforståeleg og urimeleg at han skal måtte framstå som ein del av landslaget i fleire veker etter at verdscup-sesongen blir avslutta 15. mars.

– Dette er viktig for Petter, og han håpar og trur at det fortsatt er mogleg å komme til einighet med forbundet om dette, skriv manager Langås i ein epost.

Langås vil ikkje gje ytterlegare kommentarar.

Skiforbundet nektar å fire på krava

Ein ordinær avtale med forbundet gjeld nemleg heilt fram til 1. mai. Skiforbundet har gått med på at Northug får tre ut av avtalen 15. april.

Stein Opsal

Generalsekretær i Norges Skiforbund, Stein Opsal.

Foto: Pedersen, Terje / NTB scanpix

Det vil seie at Northug må tenestegjøre for landslaget i fire veker etter at verdscupsesongen er over. Dette er Northug-leiren lite fornøgd med.

Skiforbundet bekreftar at avtalens lengde har vore diskusjonstema, men at Northug må akseptere at det ikkje er mogleg å endre på noko no.

– Dette er ikkje noko å diskutere lenger. Det har heller ikkje vore diskusjonstema i det siste. Vi har ikkje avtala fleire møter. Norges Skiforbund håpar Petter Northug signerer og gjør det bra i VM, seier informasjonssjef Espen Graff i Norges Skiforbund i ein kommentar til NRK.

– Det er viktig for oss at han frå 1. november trer inn som landslagsløpar for heile sesongen. Vi er opptatt av å behandle alle utøvarar på landslaget likt. Vi har komme til det punkt at vi ikkje gjev ytterlegare dispensjasjonar til Petter, seier generalsekretær Stein Opsal.

Opsal påpeiker at Northug allereie har fått dispensasjonar, både før og etter sesongen. Skiforbundet tok ut Northug på landslaget mot hans vilje, og meiner at Northug sånn sett har hatt dispensasjon frå 1. mai til 1. november. Forbundet har også akseptert at avtalen ikkje trer i kraft før etter sesongopninga på Beitostølen 24. november.

– Alle landslagsutøvarar har ein avtale som går over tolv månader frå 1. mai til 30. april kvart år. Petter har i år fått eit unntak i sommarhalvåret frå 1. mai til 1. november. I tillegg får han 15 dagar frå 15. april til og med 30. april etter sesongen, seier Opsal.

Om ingen av partane endrar oppfatning, går VM i Falun utan Petter Northug.

I perioden etter verdscupsesongen er over, er det vanleg at landslagsløparane stiller opp på ulike showrenn og tilstelningar i regi av landslaget og deira sponsorar.

Som NRK.no skreiv i september, er det denne gangen ein landslagsavtale, ikkje representasjonsavtale, forbundet vil at Northug skal skrive under.

Sjå forskjellen på dei to avtalane her:

– Northug-kolleksjonen har komplisert forhandlingane

Det er kjent at Petter Northug i samarbeid med Swix og Coop har ein stor kolleksjon med vinterfritidsundertøy klar for distribusjon.

Dette har også vore diskusjonstema i forhandlingane.

Norges Skiforbund nektar å la Northug selge plagg som konkurrerer med Skiforbundets leverandørar av vintertøy, men gir skiesset lov til å sende såkalla racingutstyr ut i butikkane.

Dette betyr at Northug og Coop kan selge mellom anna stavar, ski og bindingar, men ikkje plagg som dress og overtrekksdrakt.

Dette har Northug-leiren akseptert. NRK erfarer at dette punktet har vore utfordrande for begge partar.

– Vi har vore kjent med kleskolleksjonen ei tid no. Allereie i september då skistyret vedtok å stille seg bak ei skisse til løysing. Då var kleskolleksjonen del av det, seier Opsal.

– Vi meinte at vi hadde ei løysing klar den gangen. Så har det komme nye momenter på banen, som har komplisert samtalen i seinare tid, fortel generalsekretæren.

Skiforbundet: – Respekter fristen

Northug er for tida på høgdeopphald i Val Senales, der han også vil vere resten av veka - til signaturfristen er ute 1. november.

Der er han saman med både far John Northug og trenar Ole Thonstad.

Skiforbundet nektar å vente til over helga med å godta avtalen som gjør han klart til VM i Falun neste år.

  • Om Northug seier nei til avtalen med skiforbundet har han lukka alle dører for VM-deltaking.
  • Skiforbundet nektar Northug å nytte friplassen han har på 15-kilometeren i Falun som regjerande meister.
  • Northug får heller ikkje sjansen til å benytte seg av ein eventuell friplass i verdscupen som han kan få på bakgrunn av gode resultat i Skandinavisk Cup. Den som leier den skandinaviske cupen ved juletider, får i utgangspunktet delta i alle verdscuprenn på nyåret.

Siste nytt

Sendeplan

Kl. Program Kanal
VM svømming kortbane
VM svømming kortbane