– Det føles bra å spele, men sigeren mangla for oss, sa Martin Ødegaard til Strive etter kampen.
For ligameistrane frå hovudstaden skuffa i sesongstarten. Dei sleit med avslutningane, og det heile enda med frustrerande 0-0.
– Spesiell kamp
For aller første gong fekk Martin Ødegaard starte ein kamp for Real Madrid, og det på bana i San Sebastian der han blei lokal helt i førre sesong då han var på utlån hos Real Sociedad.
– Zidane ba meg om å hjelpe laget med å skape sjansar og mål, ligge i mellomrommet og angripe, sa Ødegaard.
Ødegaard blei bytta ut etter 68 minutts spel. Då hadde han hatt ein fot i mykje av det Real Madrid bygde opp i den dryge timen han var med, utan å dominere på nokon måte.. Men laget makta sjeldan å skape dei heilt store sjansane.
Nordmannen fekk ei stjerne på spelarbørsen i sportsavisa Marca. Fem Real-spelarar får to, men ingen tre.
– Det var ein heilt spesiell kamp for meg, mot gamle kameratar og gode vener, sa Ødegaard til Strive på flytande spansk. Han var bra nøgd med debuten i Madrids start-ellevar.
– Høg intensitet
Han likar også måten han har blitt motteken på i klubben.
– Det er mange gode spelarar her, og eg føler at eg går inn i laget og kjenner medspelarane, sa han.
Ødegaard måtte gå av som del av eit trippelbyte som Zinedine Zidane gjorde for å få litt meir punch i angrepet i den siste halve omgangen. Men det hjelpte ikkje, Real var like tannlause også etter at Ødegaard hadde forlate bana.
– Men dette var ingen dårleg kamp av oss. Det var vår første, og vi møtte eit lag som også spela kamp førre helg. Det var høg intensitet i spelet vårt, sa Real Madrids keeper Thibaut Courtois.
For heimelaget debuterte også David Silva då han blei bytta inn. Han spela sin første kamp i La Liga etter 10 år i Manchester City.