Krasja i kameramann - best likevel
Australske Kieran Wolley kom litt ut av kurs og braste rett inn i ein kameramann i rullebrettkvalifiseringa i OL.
Kameramannen fekk Wolley overraskande i fanget, men greidde å halde roen, og fekk filma det heile på veldig nært hald, skriv Daily Star. Han viste tommel opp til Wolley like etter kollisjonen, skriv Huffington Post.
Ingen av partane kom til skade.
Trass kollisjonen fekk Wolley omgangens høgaste poengsum. 82,69 poeng sende han til finalen som nummer to i si kvalifiseringsgruppe. Der blei han nummer fem, med lågare poengsum enn då han kolliderte med fotografen.
Gullet gjekk til hans landsmann Keegan Palmer. Han var suveren i finalen, og tok dermed OLs første gull noksinne i denne øvinga.
Det er første gongen rullebrett står på OL-programmet. I førre veke blei det konkurrert i greina street skateboard. Denne gongen var det i park skateboard.