Internett-fenomenet med oppsiktsvekkande OL-plan: – Da burde eg byte sport

– I 2028 kjem eg definitivt til å springe i OL, fortalde «IShowSpeed» under eit intervju på scena under konferansen Complex Con i Las Vegas søndag.

Den populære 19-åringen, som eigentleg heiter Darren Jason Watkins jr., annonserte at han ønsker å springe 50 meter, 100 meter og 200 meter i Los Angeles om fire år.

Han blei naturlegvis arrestert på at den kortaste distansen ikkje finst, men parerte raskt.

– Du veit kva eg meiner.

Annonseringa kom kort tid etter at han møtte regjerande olympisk meister på 100 meter, Noah Lyles, til ein duell på 50 meter. Der var Lyles, ikkje overraskande, raskast.

– Da burde eg byte sport

«IShowSpeed» vekte stor oppsikt da han besøkte Noreg tidlegare i år. Først blei det kaos i Oslo, deretter ein litt rolegare tur til Stavanger.

Amerikanaren har blitt ein enorm kjendis på internett, der han har stor suksess på fleire plattformer. På YouTube har han 33,2 millionar abonnentar, mens han har høvesvis 35,7 og 26,6 millionar følgarar på TikTok og Instagram.

I Stavanger møtte han blant anna Vikings raskaste spelar, Sondre Langås, til sprintduell på ei halv banelengde – vel 50 meter.

Ein duell som amerikanaren gjekk sigrande ut. Langås hevdar han ikkje sprang for full maskin, sidan han ikkje hadde varma opp.

– Han overraska meg dei første meterane. Han er ganske kvikk i starten, så eg tippar han heng med eit lite stykke, men han dett nok av når dei beste langar ut. Eg er ganske sikker på at eg skulle slått «Speed» på ein 100 meter. Så viss han er så god, da burde eg byte sport.

Fekk kommentarar etter tap

Langås seier han har blitt imponert og overraska over ein del av det han har sett av «IShowSpeed».

– Eg har sett han har sprunge mot Lyles og har sett nokre spensthopp. Han har ein eksplosiv kropp og ein genetikk som er vanvitig, men trur ikkje nivået er der at han skal ta medalje, flirer den norske landslagsstopparen til NRK.

For det er der nivået må ligge om ein skal til OL for USA. Ein må kunne ta medalje.

– Han verkar jo litt som ein villbass, korleis opplevde du han?

– Du har rett i ordet villbass. Han var ein livleg fyr. Han skaper mykje liv og røre. Han ville nok skapt litt meir blest, og eg tippar ein del ville sett på om han valde å gå for det.

Han fekk sjølv erfare at han går rett heim hos tenåringane.

– Ein merka at han er ganske stor i Noreg og utlandet, og at det var ein del ungdommar som ville møte meg. Eg har jo fått ein god del kommentarar i ettertid: «Er det du som sprang mot «Speed»? Du er treg!», ler Langås.

Avfeiar moglegheita

Even Meinseth er tre gonger noregsmeister på 100 meter og har sjølv OL i Los Angeles i tankane, vel å merke i den nye greina flaggfotball.

Han heller kaldt vatn i åra på tilhengarane til «IShowSpeed». For sjølv om han meiner han er ekstremt atletisk, så er konklusjonen enkel:

– Det høyrest veldig usannsynleg ut.

Meinseth meiner 19-åringen kunne blitt ein god sprintar om han la om livsstilen og trena hardt, men trur neppe det hadde halde til eit olympisk nivå.

– I tillegg hadde han aldri klart å kvalifisere seg gjennom det amerikanske uttaket. Der er det altfor høgt nivå.

Ein annan som er skeptisk er Steve Magness. Amerikanaren er friidrettstrenar og forfattar.

– Sjansen for at han kjem seg til OL er null prosent, med mindre han løpar for ein obskur nasjon. Det ville vore vanvitig sjølv om han kom i nærleiken av tida for å kvalifisere seg til OL-uttaket. Eg håpar likevel han gir det eit forsøk, skriv Magness på X.

Dei formelle krava for å delta i OL i Paris var 10,00 sekund for 100 meter og 20,16 for 200 meter. Dei same krava gjeld for VM i Tokyo neste sesong.

Det er ein del av utøvarane som kjem inn via rangering, men for ein amerikanar er det utenkeleg at ein deltar i eit OL utan å kunne springe under 10 eller 20 sekund på dei to distansane.