– No har alle dei 28 særforbunda levert inn sine lister på kven dei vil sleppe inn. No er det opp til oss å bestemme kven som skal få delta frå kva forbund.
Det seier Gerhard Heiberg då NRK møter han på plass i OL-byen. Han påpeikar at det er den internasjonale olympiske komité (IOC) som til sjuande og sist bestemmer kven som skal få delta ei deira leikar.
Sjølv om dei internasjonale forbunda altså har godkjent utøvarar puljevis, vil IOC no ta ein siste vurdering på absolutt alle.
– Me har ei tremannsgruppe som jobbar dag og natt fram til laurdag for å bestemme kven som skal få delta, og kven som ikkje får delta.
Den gruppa var nedsett på søndag, og har med det kort tid før leikane byrjar på å stenge ute dei siste utøvarane
– Eg er heldigvis ikkje med i den tremannskommisjonen, ler Heiberg
Halvering
Men det er altså sannsynleg at endå fleire russarar forsvinn frå OL. Heiberg har tidlegare uttalt at alle russarar burde bli utestengd, men har moderert seg noko.
– Utgangspunktet var 387 utøvarar, og eg trur me kjem ned mot 50 % av det.
– Vil det seie at IOC er strengare enn særforbunda?
– Det får vi se på laurdag, seier Heiberg.
– Eg var opprinneleg i mot at me i det heile skulle ha russarar, men etter samtalar med mange kollegaer komme fram til at det som kom frå vårt styre er akseptabelt.
Heiberg presiserer at alle som blir utestengde, blir det på sakleg grunnlag.
– Det dreiar seg om dopinghistoria, og kva me har som underlag. Det gjer med i samarbeid med idrettens voldsgiftsrett (CAS), men det er me som treff den endelege slutninga.
Varslarnekt
Julia Stepanova er ein av grunnane til at den systematiske dopingen av russiske utøvarar blei oppdaga. I lag med ektemannen varsla ho om dei enorme regelbrota i russisk idrett.
Sjølv om IOC-president Thomas Bach tidlegare har sagt at han er djupt takknemleg, får ho ikkje delta i OL. Det tykkjer Heiberg er synd.
– Eg må seie at eg har stor forståing for ho. Dei som har jobba med det frå oss har sagt at me må skjere alle under ein kam, og sidan ho har blitt teken for doping tidlegare skal ho ikkje få delta. Eg har forståing for begge partar, og skulle gjerne sett ho stille til start.
– Er du bekymra for ein signaleffekt at ein blir straffa sjølv om ein varslar?
– Ja, det spørsmålet forstår eg veldig godt. Eg treng ikkje sei noko meir om det, avsluttar Heiberg med eit smil.