Har tent 350 millionar kroner per kamp i Saudi-Arabia: – Ekstreme tal

– Al Hilal har fått lite igjen for Neymar-overgangen fotballmessig. Men med omsyn til PR, merksemd og å lokke til seg andre stjerner til den saudiske ligaen, så kan det godt hende dei er nøgde likevel, seier TV 2-kommentator Mina Finstad Berg.

Ifølgje Talksport fekk Neymar ei årslønn på 138 millionar pund då han signerte for Al Hilal sommaren 2023.

Med ein kurs på 14,13 (per 8. november) betyr det ei årslønn på 1,95 milliardar norske kroner.

Rundt 15 månader inn i kontrakten har Neymar derfor tent i overkant av 2,4 milliardar kroner.

Med 7 offisielle kampar på 15 månader betyr det rundt 350 millionar norske kroner per kamp.

– Det er ekstreme tal, seier NRK sin fotballekspert Carl-Erik Torp.

Han trur derimot ikkje eigarane av den saudiske ligaen ser på desse tala på same måte.

– Sportsleg har dei jo ikkje fått det dei har betalt for, men dei har fått blest rundt overgangen. Det er nok minst like viktig for eigarane, meiner Torp.

Skadd igjen

Etter fem kampar for Al Hilal hausten 2023 vart Neymar skadd i ein Brasil-kamp mot Uruguay.

Det enda med at han måtte opererast for avrive korsband og øydelagt menisk.

Comebacket denne hausten har så langt vore av det korte slaget.

– Neymar er ikkje noko enkelt tilfelle. Frå ein medisinsk ståstad er kneet hans lega, men samtidig vil han få andre problem, som muskelproblem, fordi han ikkje har spelt på lenge, sa trenar Jorge Jesus ifølgje NTB – etter at Neymar endå ein gong vart skadd denne veka.

– Skulle bli gullkalven

Mina Finstad Berg seier historia om Neymar også er ei historie om eit enormt talent som har blitt skusla vekk.

– Han gjekk frå Barcelona til PSG for å bryte ut av Messis skygge, men det gjekk opp og ned. Så kom skadane. Neymar skulle jo bli den neste store etter Messi og Ronaldo, men sjølv om han har vunne nokre store titlar vart det aldri slik, seier TV 2-kommentatoren.

Carl-Erik Torp synest Neymar si karriereutvikling etter opphaldet i Barcelona, som var over då han var 25 år i 2017, generelt sett har vore trist.

– Neymar skulle vere gullkalven som skulle ta over etter Messi. Fallet hans er eit av dei største og mest triste i fotballhistoria. Han var jo eigentleg ferdig som 26-27-åring. Men om ein ser tilbake har jo karrieren til Neymar vore vellykka når ein ser kva han har tent inn, seier NRK-eksperten.