Han er den aller første frå sitt land som får lov å spele i Premier League – men han er typisk for den engelske toppdivisjonen, der toppspelarar frå heile verda møtest. Endå ein ny nasjon er i ferd med å bli representert.
Det fortel litt om den smeltedigelen øvste serienivå i England har blitt etter at Premier League vart eit faktum for 21 år sidan. 100 land er nesten halvparten av alle nasjonar som finst i verda.
Kan takke lærarinna
Den 22-år gamle midtbanespelaren frå Kamunkunji utanfor Nairobi kan takke ei 48 år gammal lærarinne for at han har nådd denne milepælen. Sophie Makoba såg tidleg det unike talentet til Victor.
– Allereie då han var 13 år dominerte han kampar mot spelarar som var tre år eldre, minnest lærarinna.
– Eg såg at fleire av elevane hadde større sjansar for suksess i idrett enn for tradisjonell undervisning. Derfor la vi til rette for at også dei skulle få utvikle evnene sine, seier Makoba, som sjølv har elska fotball så lenge ho kan minnast.
– Vi hadde ikkje bane i landsbyen, så vi måtte låne ei bane i nabolandsbyen for treningane, seier Makoba til
.Eldstebroren fekk avslag
– Men bana der var så mykje i bruk at vi måtte vere der svært tidleg. Vi brukte å begynne klokka 05.30, og var ferdige klokka sju, slik at spelarane skulle rekke fram til skulen før klokka åtte.
Det gav resultat i form av eit miljø som fekk fram så mange gode unge spelarar at talentspeidarane fatta interesse for den lokale klubben. Mange av ungdomane som den fotballinteresserte lærarinna losa inn i fotballmiljøet, kom seg ut til profesjonelle ligaer med stor suksess.
Men unge Victor er den første som har klatra heilt til Premier League. Det var det eigentleg hans eldre bror McDonald (26) som skulle ha blitt. Men då Manchester City ville signere han i 2010, fekk han ikkje arbeidsløyve. Han hamna i staden i Inter og Serie A.
– Enorm PL-interesse i Kenya
Trass sin unge alder har Victor Wanyama lang erfaring. Som 15-åring vart han proff i AFC Leopards i heimlandet. Turen gjekk vidare til Helsingborg, Beerschot (Belgia) og Celtic, der han scora i sigeren mot Barcelona (2-1) i meisterligaen i fjor haust. Det var frå Celtic han kom til Southampton i sommar.
– Premier League er den mest populære ligaen i Kenya, og Victors deltaking kjem til å auke interessa endå meir, seier Sophie Makoba. Ho er sjølv glødande Manchester United-tilhengar, har mann og ein son som heiar på Arsenal, og ein annan son som er svoren Chelsea-fan.
Men for unge Victor er det Southampton som gjeld. I kampen mot West Bromwich i ligaopninga laurdag blir Kenya den utanlandske PL-nasjonen nummer 100 når ligaen sesongopnar laurdag.
Utlendingane i fleirtal
For ordens skuld: Spelarar frå Skottland, Wales og Nord-Irland er ikkje rekna som utlendingar i denne samanheng.
Ved årets PL-start er 63 utanlandske nasjonar representerte i troppane til dei 20 klubbane. Dei er i fleirtal med 53,6 av alle spelarane.
263 av totalt 566 spelarar er frå dei fire britiske nasjonane – det vil seie 46,4 prosent. Engelske spelarar åleine er rettnok framleis den største enkeltgruppa – 207 engelskmenn er i troppane ved sesongstart. Men dei utgjer berre 36,6 prosent – berre litt meir enn kvar tredje spelar er engelsk.
Flest engelskmenn i walisisk klubb
Det er tal som Englands landslagssjef Roy Hodgson ikkje likar. Han skulle gjerne hatt fleire av toppspelarane i landets eigen liga å velje mellom. Færrast kandidatar av alle finn han i klubben han tidlegare var manager for, Fulham. Der er berre fire i troppen engelskmenn. 19 er frå andre land enn «The Home Countries».
Flest finn han utanfor Englands grenser. Wales-klubben Cardiff har flest engelskmenn i troppen med 16.
37 nasjonar har vore innom PL tidlegare, men er ikkje med no. Blant dei er Kina og Russland.
Arsenal utan utlendingar i 1989
Før Premier League var det mykje lenger mellom utlendingane i den engelske toppdivisjonen. I 1988–89 blei Arsenal det siste laget som vann ligaen utan utlendingar.
Ti år seinare hadde pendelen svinga heilt over til den andre sida. 2. juledag i 1999 vart Chelsea første laget som hadde 11 utlendingar i startellevaren i ein ligakamp.
Men det er ein Arsenal-spelar som er den beste utlendingen i PL gjennom desse 21 åra - ialfall ifølgje ei kåring i
. Nettstaden bad publikum komponere sin beste 11-ar av utlendingane, og Henry var med i 85 prosent av oppstillingane. Han spela 254 kampar for Arsenal frå 1999 til 2007. Patrick Vieira (Arsenal 1996-2005) og Cristiano Ronaldo (Manchester United 2003-2009) følgde med 81 og 77 prosent.Aas og Hareide først frå Noreg
I 1930 trassa Arsenal det engelske fotballforbundet (FA) og signerte ein nederlandsk keeper. FA svarte med ein regel om at ingen kunne få spele profesjonell fotball i England utan å ha budd fast i Storbritannia i minst to år.
Det bremsa nokså effektivt utanlandsimporten, og denne restriksjonen vart ikkje oppheva før i 1978, då EU kravde friare flyt av arbeidskraft – også fotballspelarar.
Då vart det lettare, og dermed kunne Einar Jan Aas (Nottingham) og Åge Hareide (Manchester City og Norwich) bli dei første nordmennene i England tidleg på 80-talet.
Mange nordmenn har følgt etter, men nokre dagar før årets sesongstart er det berre fire av dei: Brede Hangeland og John Arne Riise i Fulham, Alexander Tettey i Norwich og Jonathan Parr i Crystal Palace.
PS: Det er framleis fleire dagar til ligastart og endå fleire dagar til overgangsvindauget stengjer, så desse tala vil nok kome til å endre seg litt.