– Han har vore ein brannslukkar ved fleire høve og han gjer ei dobbel-redning der, seier Dan Eggen i NRK-studio i pausen, om Boatengs akrobatikk.
Situasjonen Eggen snakkar om skjedde med knappe ti minutt att til pause. Yevheniy Konoplyanka fekk stå heilt aleine på bakre stolpe, etter eit flott innlegg frå Andriy Yarmolenko.
Konoplyanka fekk avslutta, og ballen gjekk i kroppen på Jérôme Boateng, som var centimeter unna å sette ballen i eige mål.
Ein ryggande Boateng var på veg inn i nettet, men klarte på mirakuløst vis å få kasta ut foten og sparka vekk ballen som var på veg inn i målet.
Dei ukrainske spelarane ropte på scoring, men reprisen viste at Boateng fekk ballen unna i siste sekund.
– Korleis heldt han den ute? Skulle ønske eg hadde ferdigheiter som det, melder tidlegare Liverpool-spelar, Jamie Carragher på Twitter.
- FÅ FULL OVERSIKT OVER ALLE KAMPANE HER:
ARMAR OG BEIN: Det var mykje armar og bein på Jérôme Boateng, i sekunda før han redda på streken.
Foto: Darko Vojinovic / ApHummels-vikar scora
Tyskland var storfavorittar før kampen, men det var Ukraina som fekk den beste starten. Kantspelar Yevheniy Konoplyanka fekk godt treff på eit skot frå 20 meter, men Manuel Neuer fekk slått ballen ut til corner.
Men Tyskland tok oppskriftsmessig leiinga. Eit frispark vart slått inn av Toni Kroos og i feltet steig Shkodran Mustafi til vêrs og heada Tyskland i leiinga. Mustafi starta kampen då førstevalet, Mats Hummels, er skada.
– Han er tett på, men han ligg framfor spelaren. Regelen er at ein skal ligge mellom angriparen og mål, seier NRKs ekspertkommentator, Tom Nordlie, om markeringsspelet i forkant av scoringa.
SCORINGA: Toni Kroos fann Shkodran Mustafi i feltet på eit frispark.
Ukraina fortsette å skape sjansar, trass i at Tyskland dominerte banespelet. Dei hadde ein ball i nettet bak Manuel Neuer, men vart korrekt avblåst for offside.
– Eg syns det opna overraskande med at Tyskland slo mykje i bakrom. Etter kvart gjekk dei over til meir ballbesittande spel og dei har vore det beste laget, trass i at sjansestatistikken viser noko anna, sa Tom Nordlie om første omgang.
To minutt på overtid sette innbytar Bastian Schweinsteiger inn 2–0 scoringa etter ein kontring.
– Det er min styrke å ta sånne løp. Det er utruleg når sånne ting skjer i fotball. Eg har berre 300 minutt med speletid denne sesongen, seier Schweinsteiger etter kampen.
Tyskland har saman med Spania vunne EM tre gonger, sist for 20 år sidan i England i 1996. I 2008 tapte dei finalen mot nettopp Spania.
