– Nei ... Nei.
Ho smiler mysande i den spanske sola. Tenker seg om eit kjapt sekund.
– Eg har ikkje høyrt noko altså. Du må ikkje spørje meg om det der, seier ho.
NRK møter Signe Gaupset på La Manga der ho og Brann-laget førebur seg til seriestarten mot LSK på laurdag.
Berre fire dagar seinare ventar den største kampen i klubbens historie: den NRK-sende heimekampen mot Barcelona i Meisterligaens kvartfinale onsdag 20. mars.
NRK spør om nettopp Barcelona har late høyre frå seg.
Gaupset trekker på skuldrene og svarar som om ho eigentleg ikkje bryr seg.
Ho svarer rett.
Det meiner i alle fall agenten hennar, Jens Wenzl:
– Kva skal ho svare når de i media spør om Barcelona har tatt kontakt? spør han retorisk.
Blir skjerma
Ingenting. Skal vi tru dei næraste støttespelarane hennar, veit ikkje Signe Gaupset stort.
For informasjonen når sjeldan 18-åringen. Det er eit grep agenten nyleg har tatt saman med familien.
– Ho blir informert om noko av det som skjer, men vi styrer det litt. Ein ting er kva vi fortel henne. Ein annan ting er timinga på når vi seier det, seier pappa Ketil Gaupset.
Han er ikkje den første som prøver å hjelpe dottera med å halde fokus. I januar begynte Brann å skjerme ho frå media.
Då NRK fekk snakke med 18-åringen på La Manga, var det i nokre ledige minutt mellom trening og skolearbeid.
– Det har blitt litt mykje i det siste, seier Gaupset sjølv.
Ho ser litt todelt på det å bli skjerma.
– Eg synest skjerminga er grei for min del. Då får eg fokusert på det eg kan gjere noko med.
– Samtidig er det læring i å drive med media. Det er noko eg kjem til å gjere mykje framover i karrieren. Eg er vel framleis litt på leit etter den balansen, fortset ho.
Heimanfrå i Molde har far og agent jamleg kontakt. Slik har det eigentleg vore sidan gjennombrotet, som kan seiast å fortsette framleis. For det har blitt nokre milepælar:
Agent: – Over 15 klubbar har tatt kontakt
Pappa Kjetil er sjølvsagt fullt klar over at telefonen til agenten har gått varm. Ifølge teamet rundt Gaupset vil «alle» toppklubbane vil ha signaturen til dotter hans.
Minst 15 ulike toppklubbar frå Europas største ligaer har forhøyrt seg om Signe Gaupset, kan agent Wenzl fortelje.
– Det er heilt spesielt. Det skjer ikkje ofte.
– Eg kan ikkje hugse å ha opplevd så mykje interesse for ein spelar i kvinnefotballen sidan Caroline Graham Hansen før ho drog til Wolfsburg i 2014.
Kva slags klubbar vil ikkje Wenzl avsløre, men:
– Når ein snakkar om toppklubbane i dei beste ligaene i Europa, kan du jo tenke deg sjølv.
- Følg og sjå Toppseriekampen mellom LSK Kvinner og Brann på NRK frå 16.30 laurdag.
«Drit i å bli kopla til storklubbar»
Fram til den nylege skjerminga frå familie og agent, har 18-åringen i brotstykke fått vite kva klubbar som har slått på tråden.
– Men ho drit i det. Det er det som er fantastisk. Ho mister aldri bakkekontakten.
– Dei fleste spelarar ønsker at det skal lekast ut offentleg når ein storklubb koplar seg til namnet ditt. Dei vil bli nemnde i samanheng med store klubbar, fortel agenten.
– Det betyr ingenting for henne, supplerer pappa Ketil.
Han understrekar at dotter hans meir enn alt berre er veldig lykkeleg der ho er.
– Det er til å få tårer i auga av, berre det å tenke på alt som skjer i Brann nå. Sånne ting betyr noko. Det er det som gjer at ho tenker at det er den rette staden å vere vidare.
– Ho er unik
NRKs fotballekspert Carl-Erik Torp har null problem med å tru på beskrivinga til støttespelarane til superstjerna.
– Eg trur på at ho verkeleg ikkje bryr seg om alt det som skjer rundt henne. Ho er unik på fleire måtar. Ho er ekstremt tidleg ute reint fysisk, men også når det gjeld modnad. Hadde nokon sagt at ho var 25 år, ville ingen stussa over det, meiner han.
Han beskriv den enorme interessa rundt spelaren som «ei sjeldan vare».
– Eg har sett nokre utanlandske stjerner med den interessa. Men ein såg ung norsk spelar som alle klubbar vil ha, det er utruleg kult, seier Torp og legg til:
– Det er ganske sjukt å ha ein ung norsk spelar i denne posisjonen. Hadde du spurt meg for nokre år sidan om vi skulle få eit så stort talent som Signe Gaupset, så hadde eg ikkje trudd deg. Det er mot all fornuft.