Storbritannia frådømt OL-sølv
Storbritannia blir fråtekne sølvet på 4 x 100 meter stafett i Tokyo-OL fordi Chijindu Ujah testa positivt for doping.
Det har Idrettens valdgiftsrett (CAS) i Lausanne avgjort.
Ujah testa positivt for dei forbodne stoffa ostarin og S-23 undervegs i OL. Dei har same effekt som anabole steroid. I september blei det klart at også B-prøven hans var positiv.
Dei tre andre sprintarane på stafettlaget var Zharnel Hughes, Richard Kilty og Nethaneel Mitchell-Blake. Dei mister alle den einaste OL-medaljen dei har tatt i karrieren.
Avgjerda gjer at Canada blir flytta opp til sølvplass, medan Kina får bronse. Italia vann den kortaste OL-stafetten for menn.
Ujah har vore mellombels suspendert sidan sommarleikane i Tokyo. Etter CAS-dommen skal Friidrettens integritetseining (AIU) avgjere om han skal bli utestengd vidare.