– Vi scorar 31 mål borte. Det er veldig sterkt, og eg er ikkje nøgd med kampen på nokon som helst måte. Angrepsmessig er det mykje fint, men i forsvar er vi ikkje på i det heile, seier Vipers-trenar Kenneth Gabrielsen.
– Men det er detaljar å rette på, så har eg stor tru på at vi kan klare dette, seier han.
Danskane vann 34–31 føre 2000 tilskodarar entusiastiske tilskodarar på heimebane.
Sjå intervju med Vipers-trenar Kenneth Gabrielsen.
– Stort
Kring 600 av dei var Vipers-supporterar som hadde teke turen med danskebåten frå Kristiansand.
– Det er heilt utruleg å sjå så mange ta turen. Det er stort å få vere med på, seier Gabrielsen.
Men intens støtte på tribunen var ikkje nok til å sikre sigeren i Viborg Stadionhal. Danskane leia 18–16 til pause og gjekk ut i hundre i andre omgang.
Midtvegs i andre omgang leia heimelaget med seks mål. Sørlendingane la inn eit ekstra gir og var berre tre mål bak ti minutt før slutt.
Fleire hundre Vipers-supporterar reiste til Danmark for å sjå oppgjeret mot Viborg.
Frå semifinale til seriefinale
Men der vart det stopp. Rosatrøyene kom aldri nærare og må dermed ta att tre mål i returoppgjeret i Kristiansand neste helg, for å nå finalen i EHF-cupen.
Vipers-veteranane Katrine Lunde og Kristine Lunde Borgersen har tidlegare vunne både serie, cup og Meisterligaen med Viborg.
– Det er alltid spesielt å komme tilbake til stader ein har budd tidlegare. Dessverre vart det tap no, men dette kan vi klare å snu heime, seier Katrine Lunde.
Allereie onsdag skal sørlendingane i aksjon i ein særs viktig kamp igjen. Då er det seriefinale mot Larvik. Med siger sikrar laget etter alt å dømme sitt første seriegull.
– Det er perfekt med ein slik kamp mot Viborg før Larvik-kampen. Heilt perfekt, seier Vipers-trenaren.
Katrine Lunde og Kristine Lunde Borgersen var tilbake på si gamle heimebane då Vipers møtte Viborg. Tvillingsøstrene har vunne ei rekkje titlar med den danske klubben.
Foto: Sander Heggheim / NRK
