Vipers sjokkerte mot Larvik i semifinalen

VIPERS - LARVIK 31-25 (15-13): Larvik som ikkje har tapt ein norsk seriekamp sidan 2001 fekk juling av Vipers Kristiansand i sluttspelet i handball.

Jessy Kramer, Vipers Kristiansand

Jessy Kramer og Vipers slo Larvik.

Foto: Sander Heggheim/NRK
Vipers - Larvik

Anja Hammerseng Edin vart stoppa av Vipers.

Foto: Sander Heggheim/NRK

Sørlendingane banka til frå første sekund mot giganten frå Larvik.

Landslagsstjerner som Anja Hammerseng Edin, Nora Mørk, Karoline Dyhre Breivang og Linn Jørum Sulland vart gjort til statistar.

Vipers-trenar Gunnar Pettersen gjorde eit smart trekk med å ta ut keeper Sakura Hauge i første omgang, og heller sette inn ein utespelar.

– Det er tøft gjort. Det krev ballar for å gjere noko slikt i første omgang, seier sportsleg leiar i Vipers, Peder Langfeldt.

Vipers-jentene gjekk til pause med 15-13 til enorm jubel frå dei 1500 tilskodarane som hadde møtt opp i Aquarama.

I andre omgang trudde nok mange at Larvik skulle slå tilbake, men Vipers heldt unna og vann sensasjonelt 31-25 mot meisterligaklubben.

Også i fjor tapte Larvik ein kamp i sluttspelet. Trass tap mot Tertnes gjekk laget heile vegen og vann sluttspelet til slutt.

Karoline Dyhre Breivang mot Vipers Kristiansand

Karoline Dyhre Breivang og Larvik fekk det ikkje til å stemme mot Vipers Kristiansand.

Foto: Sander Heggheim/NRK