Vil ha «is-politi» i Arendal

Glatte vegar og fortau har ført til mange fallskader. No vil Venstre i Arendal at parkeringsvaktene i byen skal bli «is-politi».

"Is-politi"

«IS-POLITI»: Jan Kløvstad i Arendal Venstre vil at parkeringsvaktene i byen skal passe på at fortaua er godt nok strødd. (Arkivfoto)

Foto: NRK

Det er huseigarane som har ansvaret for å strø. Men mange gir blaffen og fortaua blir speilglatte.

– Vi vil at dei skal varsle huseigaren om å få orden på forholda, seier Jan Kløvstad frå Venste til NRK.no.

Opptatt politi

– Viss dei ikkje får orden på forholda får dei be politiet rydde opp, seier han.

– Vårt poeng er at vi tykkjer at politiet har mykje å gjere. VI vil at vi skal løyse utfordringane på eit lågaste mogleg nivå. Difor vil vi at parkeringsvaktene skal trå til, seier han.

Venstre tok opp saka første gang i juni i fjor då politivedtektene vart diskutert.

– Ingen er betre kjende enn dei i gatene. Dei kan sjå etter når det er farleg, seier han.

Farlege situasjonar

Glatte fortau gjer at folk heller vel å gå på vegane, som igjen skapar problem for biltrafikken.

– Det er ein god del farlege situasjonar med folk som held på å falle, og bilar som må rygge fordi det er enkelte stader det er glatt ute i gata også, seier Kløvstad.

– Det er huseigarane som har ansvaret for å strø, seier han.