Rykte ut på tre brannar på tre timar

– Det er veldig tørt. Vi må berre gjenta at folk må vere særs forsiktige med bruk av eld, seier operatør ved 110-sentralen på Agder, Stig Trondsen til NRK.

• Sjekk skogbrannfaren i ditt distrikt

I 9-tida søndag rykte brannvesenet ut til det dei trudde var ein brann i Gjerstad. Det viste seg etter kvart at det var ein bråtebrann.

Brann i transformator spreidde seg

Ein time seinare var brannvesenet igjen på farten. Denne gangen til ein krattbrann på Akland i Risør. Kring to timar seinare var brannen sløkt.

Ved 11-tida braut det ut ein brann i ein transformator ved Steinfoss kraftstasjon i Vennesla. Kring tre timar seinare fekk brannvesenet kontroll over brannen. Årsaka til brannen skal ha vore ein leidning som fall ned og førte til jordfeil.

– Det er veldig tørt mange stader og skogbrannfareindeksen går oppover heile tida, seier Trondsen.

Det er på Sørlandet og Austlandet skogbrannfaren er størst.

På Kongsberg i Buskerud, Nissedal i Telemark, Åmli og Froland i Aust-Agder er det svært stor skogbrannfare ifølgje yr.no si oversikt.

Full beredskap

– Vi har full beredskap så godt det let seg gjere. Men som sagt må folk vere særs forsiktige, seier Trondsen ved 110-sentralen på Agder.

Også laurdag måtte brannvesenet ut på ei rekkje brannar på Sørlandet. I Flekkefjord vart 14 båthus totalskadd i ein brann.

I Søgne fekk brannvesenet raskt kontroll over ein krattbrann ved Grøvansveien. På Valdro brann ein låve ned laurdag kveld.