Sommarvarmen fortset: – Ser ikkje kalde prognosar

– Det er lenge sidan det har vore så varmt så tidleg på året, konstaterer statsmeteorolog Terje Alsvik Walløe.

I pinsa har folk i Sør-Noreg kost seg med høge sommartemperaturar, is og bading. Varmast i Agder var det i Valle med 24, 2 varmegrader 2. pinsedag.

Deretter følgde Åseral og Lyngdal med 24, 1 varmegrader.

Ifølge Walløe har det ikkje vore så varmt på Sørlandet i starten av mai sidan 2018.

– Aust i Agder ligg mai-temperaturen tre grader over normalen mens han vest i fylket ligg fire–fem grader over normalen, seier meteorologen.

Litt regn torsdag og fredag

Han lovar solhungrige sørlendingar at vêret framleis vil halde seg fint, men at det kan bli nokre lokale regnbyer mot slutten av arbeidsveka.

– Høgtrykket er stabilt, men er litt trua sørfrå. Det er mykje nedbør på kontinentet som begynner å dra seg mot breiddegradene våre utpå torsdagen, seier Walløe.

Dermed kan det bli litt regnbyer torsdag og fredag.

Auka fare for skogbrann

Hittil i mai har det vore lite nedbør og skogbrannfaren er nå på raudt nivå stort sett i heile Agder.

I tillegg til at det er tørt er det også meldt ein del vind, noko som gjer at brannar potensielt kan spreie seg raskt om ein ikkje får kontroll på dei raskt.

– Litt regnbyer er kanskje godt nytt med tanke på skogbrannfaren?

– Ja, nokre bønder håpar nok også på litt regn snart. Da kan det komme ein del millimeter lokalt. Det har vore lite nedbør hittil i mai, seier Terje Alsvik Walløe.

Trass i litt regnbyer vil sommarvarmen fortsette ei god stund til, ifølge Walløe.

– Det er sommarlege temperaturar også med sol i helga. Men ikkje like stabilt som vi har hatt den siste tida.

Høge badetemperaturar

I fleire av innsjøane i Agder, for eksempel Grimsvannet, har badetemperaturen allereie bikka 20-talet. I sjøen er temperaturen opp mot 17 grader.

– Det er veldig høge badetemperaturar. Ofte er vi ikkje på dette nivået i juli ein gong. Er ein glad i å bade bør ein nytte anledninga no når det er godt og varmt, og vi har sol.

– Vi bruker ikkje opp sommaren nå da?

– Nei, temperaturen ser ut til å ligge over snittet for årstida neste veke også og fram mot starten av juni. Eg kan ikkje sjå nokon kalde prognosar framover, seier statsmeteorolog Terje Alsvik Walløe.