SISTE: Brannvesenet melder om at dei har kontroll over skogbrannen og at dei no driv ettersløkkjing.
Ifølgje politiet skal det førebels ikkje vere fare for at brannen skal spreie seg til bustadområde.
– Vi har fått opp ein brannbil frå Kristiansand. Det pågår no sløkkjearbeid, seier Stig Trondsen, operatør ved 110-sentralen til NRK.
Leidning datt ned
Brannen har truleg starta i transformatoren etter at ein leidning har falle ned og ført til jordfeil.
– Vi samarbeider no med brannvesenet for å få sløkt brannen. Vi må jo stoppe straumtilførselen i området, seier kommunikasjonsrådgjevar i Agder Energi, Hanne Liv Refsnes.
Ifølgje Refsnes er det i første rekkje industrikundar som er utan straum ved 12.20-tida. Mellom andre Returkraft og Xstrata.
– Men når vi må kople ut straumen vil fleire vere utan straum til vi har fått sløkt brannen, seier ho.
– Nesten som fyrverkeri
Det er førebels uvisst kor mange som vil misse straumen.
NRKs reporter Knut Knudsen Eigeland var i området då det tok til å brenne.
– Vi høyrde knitring i leidningsnettet og plutseleg byrja det å gneiste voldsomt. Det small skikkeleg. Det var nesten som fyrverkeri, seier han.
VIDEO: Brannvesenet dreiv ettersløkkjing søndag ettermiddag.
